⛔ प्ली बार्गेनिंगद्वारे गुन्ह्याची कबुली; ₹१,५०० दंडाचीही ठोठावली शिक्षा
✍️पांढरकवडा : अशफाक खान
शासकीय कामात अडथळा आणणे, मारहाण करणे तसेच शिवीगाळ व धमकी दिल्याप्रकरणी आरोपीला पांढरकवडा येथील अतिरिक्त सत्र न्यायालयाने न्यायालय उठेपर्यंतची शिक्षा आणि १ हजार ५०० रुपयांचा दंड ठोठावला. अतिरिक्त सत्र न्यायाधीश एम. ए. कोठारी यांनी ८ ऑक्टोबर २०२६ रोजी हा निकाल दिला.
या प्रकरणातील आरोपी विनयकुमार रामलखन सिंग (वय ४९, रा. घुग्गुस, ता. जि. चंद्रपूर) याच्याविरुद्ध शिरपूर पोलीस ठाण्यात दाखल असलेल्या अप. क्र. ७०/२०१४ मधील भारतीय दंड विधानाच्या कलम ३५३, ३२३, ५०४ आणि ५०६ अन्वये गुन्हा नोंदविण्यात आला होता. या प्रकरणाचे फौजदारी प्रकरण क्र. ५१/२०२२ पांढरकवडा येथील सत्र न्यायालयात न्यायप्रविष्ट होते.
🎯 कार्यालयात येऊन केली मारहाण; शासकीय कामात आणला अडथळा
या प्रकरणाची पार्श्वभूमी अशी की, २९ जुलै २०१४ रोजी फिर्यादी शंकर केजाजी बोडे (वय ४९) हे डब्ल्यूसीएलच्या निलजई येथील कार्यालयात आपले शासकीय काम करीत होते. त्यावेळी आरोपी विनयकुमार रामलखन सिंग हा कार्यालयात आला. त्याने फिर्यादीचा कॉलर पकडून मारहाण केली तसेच त्याच्या कामाच्या बिलाचे पैसे देण्याची मागणी केली.
या प्रकारामुळे शासकीय कामात अडथळा निर्माण झाल्याने शंकर बोडे यांनी त्याच दिवशी शिरपूर पोलीस ठाण्यात तक्रार दाखल केली. त्यावरून आरोपीविरुद्ध भादंवि कलम ३५३, ३२३, ५०४ व ५०६ अन्वये गुन्हा दाखल करण्यात आला.
🎯 तपास पूर्ण करून न्यायालयात आरोपपत्र दाखल
गुन्ह्याचा तपास पूर्ण करून तपासी अधिकारी पोलीस हवालदार शंकर राजगडकर यांनी आरोपपत्र तयार करून प्रथम वर्ग न्यायदंडाधिकारी, वणी यांच्या न्यायालयात सादर केले. त्यानंतर सदर प्रकरण पुढील न्यायालयीन कार्यवाहीसाठी पांढरकवडा येथील अतिरिक्त सत्र न्यायालयात वर्ग करण्यात आले.
🎯 Plea Bargainingचा मार्ग स्वीकारला
न्यायालयीन कार्यवाहीदरम्यान आरोपीने Plea Bargaining (दोषारोप तडजोडीची प्रक्रिया) अंतर्गत गुन्ह्याची कबुली देत शिक्षेत सवलत मिळण्यासाठी फिर्यादीसोबत तडजोड केली. त्यानंतर न्यायालयाने फिर्यादी तसेच सरकारी पक्षाचे म्हणणे ऐकून फौजदारी प्रक्रिया संहितेच्या कलम २६५-बी अन्वये आवश्यक कायदेशीर प्रक्रिया पूर्ण केली.
संपूर्ण कार्यवाहीअंती आरोपीविरुद्ध गुन्हा सिद्ध झाल्याचे नमूद करत अतिरिक्त सत्र न्यायाधीश एम. ए. कोठारी यांनी आरोपी विनयकुमार रामलखन सिंग याला संबंधित कलमांखाली न्यायालय उठेपर्यंतची शिक्षा आणि एकूण १,५०० रुपयांचा दंड ठोठावला.
🎯 पोलीस व सरकारी पक्षाची महत्त्वपूर्ण भूमिका
या प्रकरणाच्या न्यायालयीन कार्यवाहीत शिरपूर पोलीस ठाण्याचे ठाणेदार संतोष मनवर, सहायक सरकारी अभियोक्ता आर. डी. मोरे, फिर्यादी तसेच कोर्ट पैरवी पोलीस कॉन्स्टेबल कल्पेश चांदेकर यांनी महत्त्वाची भूमिका बजावली.
पांढरकवडा न्यायालयाच्या या निकालामुळे शासकीय कर्तव्य बजावत असलेल्या कर्मचाऱ्यांच्या कामात अडथळा आणणे, त्यांच्याशी गैरवर्तन करणे किंवा धमकी देणे यासारख्या प्रकारांवर कायदेशीर कारवाई होऊ शकते, हा संदेशही या प्रकरणातून अधोरेखित झाला आहे.
