⛔ ‘धम्मचक्र प्रवर्तन दिनाने लाखो अनुयायांच्या जीवनात समता, विवेक आणि नवविचारांचा प्रकाश’
✍️वणी : महेश टिपले
१४ ऑक्टोबर १९५६ रोजी नागपूरच्या दीक्षाभूमीवर विश्वरत्न डॉ. बाबासाहेब आंबेडकर यांनी लाखो अनुयायांसह बौद्ध धम्माची दीक्षा घेतली. भारतीय सामाजिक इतिहासाला कलाटणी देणाऱ्या या ऐतिहासिक घटनेच्या स्मरणार्थ दरवर्षी धम्मचक्र प्रवर्तन दिन साजरा केला जातो. या पवित्र दिनानिमित्त डॉ. बाबासाहेब आंबेडकर विचार मंचाच्या वतीने महामानव डॉ. बाबासाहेब आंबेडकर यांना अभिवादन करण्यात आले.
डॉ. बाबासाहेब आंबेडकर यांनी बौद्ध धम्माचा स्वीकार करताना केवळ धार्मिक परिवर्तन केले नाही, तर लाखो वंचित आणि शोषित समाजबांधवांना समता, स्वातंत्र्य, बंधुता, न्याय, विवेक आणि मानवतेवर आधारित जीवनाची नवी दिशा दिली. शतकानुशतके सामाजिक विषमता, अंधश्रद्धा आणि अन्यायाच्या जोखडात अडकलेल्या समाजाला शिक्षण आणि विचारांच्या माध्यमातून आत्मसन्मानाने उभे राहण्याची प्रेरणा त्यांनी दिली.
धम्मचक्र प्रवर्तन दिन हा केवळ एका ऐतिहासिक घटनेचे स्मरण करण्याचा दिवस नसून, बाबासाहेबांनी दिलेल्या समतावादी आणि मानवतावादी विचारांचे आत्मपरीक्षण करण्याचा दिवस असल्याचे यावेळी उपस्थितांनी सांगितले. ज्ञान, करुणा, प्रज्ञा आणि समतेच्या मार्गाने समाजाची वाटचाल व्हावी, तसेच जातीय व सामाजिक भेदभाव दूर करून बंधुभावाची भावना अधिक दृढ व्हावी, असा संदेश या अभिवादन कार्यक्रमातून देण्यात आला.
या निमित्ताने डॉ. बाबासाहेब आंबेडकर विचार मंचाच्या पदाधिकाऱ्यांनी व सदस्यांनी बाबासाहेबांच्या प्रतिमेला अभिवादन करून त्यांच्या विचारांप्रती कृतज्ञता व्यक्त केली. ‘शिका, संघटित व्हा आणि संघर्ष करा’ या बाबासाहेबांच्या संदेशातून प्रेरणा घेत शिक्षणाला प्राधान्य देणे, समाजातील प्रत्येक घटकाला समान संधी मिळवून देणे आणि समताधिष्ठित समाजनिर्मितीसाठी सातत्याने कार्यरत राहण्याचा निर्धार यावेळी व्यक्त करण्यात आला.
🎯 हे मान्यवर व सदस्य होते उपस्थित
अभिवादन कार्यक्रमाला डॉ. बाबासाहेब आंबेडकर विचार मंचाचे अध्यक्ष बंडू कांबळे, सचिव विजय नगराळे, उपाध्यक्ष संजय तेलंग, कोषाध्यक्ष रामदास कांबळे यांच्यासह नरेश तेलंग, कवडू जिवणे, करुणा कांबळे, विवेक गाडगे, रवी कांबळे, विवेक तेलंग, गोवर्धन तेलतुम्बडे, वसंत नगराळे, मनोहर ठमके, सुरेशभाऊ रायपुरे, पुंडलिक पाथाडे, चंद्रसेन जिवणे, रामभाऊ टिपले, किशोर चहांदे, मिलिंद पाटील, प्रकाश खोब्रागडे, भारत कुंभारे, जुनघरी, अनिल थुल आदी पदाधिकारी, कार्यकर्ते व समाजबांधव उपस्थित होते.
धम्मचक्र प्रवर्तन दिनाच्या निमित्ताने बाबासाहेबांचा समतेचा विचार केवळ स्मरणात न ठेवता तो आचरणात आणणे, शिक्षणाच्या माध्यमातून समाजाची प्रगती साधणे आणि सामाजिक सलोखा मजबूत करणे, हाच महामानवाला खरे अभिवादन ठरेल, असा सूर यावेळी उमटला.
