✍️वणी प्रतिनिधी :
वणी येथील सुप्रसिद्ध श्रुती इलेक्ट्रॉनिकचे संचालक, व्यापारी व सामाजिक क्षेत्रात आपली वेगळी ओळख निर्माण करणारे श्री. मधुकर गजानन मोडक (मधुभाऊ मोडक) यांचे सोमवार, दिनांक १५ डिसेंबर २०२५ रोजी पहाटे ३ वाजता दीर्घ आजाराने दुःखद निधन झाले. त्यांच्या निधनाने वणी शहरातील व्यापारी, सामाजिक व परिचित वर्तुळात तीव्र शोक व्यक्त केला जात आहे.
अत्यंत मनमिळाऊ, दिलखुलास स्वभाव, ग्राहकांशी आपुलकीने वागणूक आणि प्रामाणिक व्यवहार यासाठी मधुभाऊ मोडक सर्वत्र परिचित होते. श्रुती इलेक्ट्रॉनिकच्या माध्यमातून त्यांनी वणी शहरात दर्जेदार सेवा, विश्वासार्हता आणि ग्राहकाभिमुखतेचा आदर्श निर्माण केला. अनेक वर्षे त्यांनी इलेक्ट्रॉनिक व्यवसायात प्रामाणिकपणे काम करत व्यवसायासोबतच सामाजिक सलोखा जपण्यावर भर दिला.
व्यवसायाबरोबरच ते सामाजिक उपक्रमांतही सक्रिय सहभाग घेत असत. गरजूंना मदत, ओळखीच्या व अनोळखी व्यक्तींशीही आपुलकीने संवाद साधणे, शहरातील विविध कार्यक्रमांत उपस्थित राहणे ही त्यांची वैशिष्ट्ये होती. त्यामुळेच त्यांच्या अकाली जाण्याने शहराने एक कर्तव्यदक्ष व्यापारी आणि संवेदनशील व्यक्तिमत्त्व गमावले आहे, अशी भावना सर्वत्र व्यक्त होत आहे.
🎯अंत्ययात्रा व अंत्यसंस्कार:
स्व. मधुकर गजानन मोडक यांची अंत्ययात्रा आज सोमवार, दुपारी ३ वाजता, त्यांच्या पटवारी कॉलनी, वणी येथील राहत्या घरातून निघणार असून वणी येथील स्मशानभूमीत त्यांच्यावर अंत्यसंस्कार करण्यात येणार आहेत.
🎯 पश्चात:
त्यांच्या पश्चात पत्नी, तीन मुले, तसेच आप्तेष्ट असा मोठा परिवार आहे.
त्यांच्या निधनाबद्दल वणी शहरातील व्यापारी संघटना, मित्रपरिवार, ग्राहक व नागरिकांकडून शोकसंवेदना व्यक्त करण्यात येत असून, “मधुभाऊ मोडक यांच्या आठवणी सदैव स्मरणात राहतील” अशी भावना सर्वत्र व्यक्त होत आहे.
