✍️पांढरकवडा : अशफाक खान
पांढरकवडा नगरपरिषदेच्या नवनिर्वाचित नगराध्यक्षपदी आतिश उर्फ सोनू बोरले यांनी आज विधिवत पदभार स्वीकारला. या सोहळ्याला केवळ प्रशासकीय कार्यक्रमापुरते मर्यादित न ठेवता त्यांनी जनतेशी नाते अधिक दृढ करणारा भावनिक आणि प्रेरणादायी संदेश दिला. पदभार स्वीकारताना त्यांनी सर्वप्रथम पराभूत उमेदवारांचा सन्मान करत “राजकारणापेक्षा शहराचा विकास महत्त्वाचा” असल्याचे ठामपणे सांगितले.
🎯 नगरपरिषदेच्या एकूण २२ जागांपैकी भारतीय जनता पार्टीच्या ६ जागा तर शिवसेना (शिंदे गट) विरोधी पक्षाच्या १६ जागा निवडून आल्या आहेत. अशा परिस्थितीतही सर्व नगरसेवकांना विश्वासात घेऊन समन्वयातून कारभार करण्याचे स्पष्ट संकेत नवनिर्वाचित नगराध्यक्षांनी दिले.
🎯 ऐतिहासिक विजयाची पार्श्वभूमी
निवडणूक निकालात आतिश उर्फ सोनू बोरले यांनी ७,८२९ मतांच्या बहुमताने नगराध्यक्षपदाची बाजी मारली. हा विजय केवळ वैयक्तिक नसून पांढरकवडा नगरपरिषदेच्या इतिहासात भारतीय जनता पार्टी कडून मिळालेला पहिलाच नगराध्यक्ष असल्याने पक्षासाठी तसेच शहरासाठीही हा ऐतिहासिक क्षण ठरला आहे.
🎯 धार्मिक परंपरा आणि लोकभावनेचा संगम
पदभार स्वीकारण्यापूर्वी नवनिर्वाचित नगराध्यक्षांनी केळापूर येथे जाऊन जगदंबा मातेचे दर्शन घेतले. त्यानंतर पांढरकवड्यात आगमन होताच नगरपरिषदेत प्रवेश करण्यापूर्वी छत्रपती शिवाजी महाराजांच्या पुतळ्याला अभिवादन करण्यात आले. नगरपरिषदेच्या प्रवेशद्वारावर गौपूजन, शंखनाद, तुतारीचा गजर आणि फुलांच्या वर्षावात त्यांचे जंगी स्वागत झाले. नगरपरिषदेच्या उंबरठ्यावर नतमस्तक होत त्यांनी जनतेप्रती कृतज्ञता व्यक्त केली, ही कृती उपस्थित नागरिकांच्या मनाला भावून गेली.
🎯 विधिवत पदभार स्वीकार
नगराध्यक्ष कार्यालयात प्रवेश केल्यानंतर जगदंबा मातेच्या प्रतिमेची विधिवत पूजा करून त्यांनी अधिकृतपणे पदभार स्वीकारला. या वेळी शहराच्या सर्वांगीण विकासासाठी पारदर्शक, लोकाभिमुख आणि गतिमान प्रशासन देण्याचा संकल्प त्यांनी व्यक्त केला.
🎯 मान्यवरांची उपस्थिती
या भव्य सोहळ्याला लोकनेते व माजी आमदार अण्णासाहेब पारवेकर, केळापूर–आर्णी विधानसभा मतदारसंघाचे आमदार राजू तोडसाम आदी मान्यवरांनी उपस्थित राहून नगराध्यक्षांचा सत्कार केला.
🎯 उत्सवाचे वातावरण
पालिकेच्या परिसरात लहान मुलींनी लेझीम खेळत स्वागत केले. तुतारीचा निनाद, फटाक्यांची आतषबाजी आणि नागरिकांच्या प्रचंड उपस्थितीमुळे संपूर्ण परिसरात जल्लोषाचे वातावरण निर्माण झाले. भाजप पदाधिकारी, नगरसेवक आणि नागरिक मोठ्या संख्येने या सोहळ्यास उपस्थित होते.
🎯 विकासाचा संकल्प
समारोपाच्या भाषणात नगराध्यक्ष आतिश उर्फ सोनू बोरले यांनी स्वच्छता, पाणीपुरवठा, रस्ते, नागरी सुविधा, पारदर्शक प्रशासन आणि सर्वसमावेशक विकास या मुद्द्यांना प्राधान्य देण्याचे आश्वासन दिले. “हे पद माझ्यासाठी सन्मान नाही, तर जबाबदारी आहे” असे सांगत त्यांनी जनतेच्या विश्वासाला पात्र ठरण्याचा निर्धार व्यक्त केला.
एकूणच, पांढरकवडा नगरपरिषदेतील हा पदभार सोहळा केवळ राजकीय घडामोड न राहता, शहराच्या नव्या विकास पर्वाची सुरुवात ठरल्याची भावना नागरिकांमध्ये व्यक्त होत आहे.
