✍️पांढरकवडा : अशफाक खान
मराठी पत्रकारितेचे जनक आचार्य स्व. बाळशास्त्री जांभेकर यांच्या जयंतीनिमित्त पत्रकार दिन पांढरकवडा येथील प्रेस क्लब पांढरकवडाच्या वतीने सोमवार, दि. ६ जानेवारी रोजी मोठ्या उत्साहात साजरा करण्यात आला. स्थानिक विश्रामगृहात सायंकाळी आयोजित या कार्यक्रमास शहरातील पत्रकार, प्रेस क्लबचे पदाधिकारी व सदस्य मोठ्या संख्येने उपस्थित होते.
कार्यक्रमाची सुरुवात दीपप्रज्वलन करून तसेच आचार्य बाळशास्त्री जांभेकर यांच्या प्रतिमेला पुष्पहार अर्पण करून करण्यात आली. उपस्थित सर्व पत्रकारांनी त्यांच्या कार्याला आदरांजली वाहत मराठी पत्रकारितेच्या उज्ज्वल परंपरेचे स्मरण केले.
कार्यक्रमात मार्गदर्शन करताना प्रेस क्लब पांढरकवडाचे अध्यक्ष प्रवीण पिन्नमवार यांनी आचार्य बाळशास्त्री जांभेकर यांच्या कार्याचे महत्त्व सविस्तरपणे विशद केले. ते म्हणाले की, ६ जानेवारी १८१२ रोजी जन्मलेल्या आचार्य जांभेकर यांनी १८३२ साली ‘दर्पण’ हे मराठी भाषेतील पहिले वृत्तपत्र सुरू करून मराठी पत्रकारितेचा भक्कम पाया घातला. समाजप्रबोधन, विज्ञाननिष्ठ विचारसरणी, विवेकवाद आणि आधुनिक शिक्षणाचा प्रसार हे त्यांच्या पत्रकारितेचे मुख्य उद्दिष्ट होते. त्यांनी सुरू केलेल्या निर्भीड आणि विवेकी पत्रकारितेमुळे समाजात जागृती निर्माण झाली आणि मराठी पत्रकारितेला नवी दिशा मिळाली. आजच्या काळातही त्यांचे विचार पत्रकारांसाठी मार्गदर्शक आणि प्रेरणादायी असल्याचे त्यांनी नमूद केले.
यावेळी पत्रकारितेतील नैतिकता, सत्यनिष्ठा आणि समाजहित जपण्याची गरज यावरही विचार मांडण्यात आले. बदलत्या काळात पत्रकारांनी जबाबदारीने व निर्भीडपणे आपली भूमिका बजावावी, असे आवाहनही करण्यात आले.
यानंतर प्रेस क्लब पांढरकवडाच्या सर्व पदाधिकाऱ्यांचा पुष्पगुच्छ देऊन सन्मान करण्यात आला. कार्यक्रमास प्रेस क्लबचे अध्यक्ष प्रवीण पिन्नमवार,उपाध्यक्ष सफी खान, सचिव रवि वल्लमवार, कोषाध्यक्ष योगेश मडावी, ज्येष्ठ पत्रकार अशफाक खान, ज्येष्ठ पत्रकार संभा मडावी, वाजीद कुरेशी, तनवीर शेख, गणेश सामझवार, संतोष मग्गीडवार तसेच अन्य पदाधिकारी व सदस्य उपस्थित होते.
कार्यक्रमाचा समारोप पत्रकारितेतील मूल्ये, सत्य, सामाजिक बांधिलकी आणि लोकशाहीची चौथी स्तंभ म्हणून असलेली जबाबदारी प्रामाणिकपणे जपण्याचा संकल्प करून करण्यात आला. पत्रकार दिनानिमित्त आयोजित या कार्यक्रमामुळे उपस्थित पत्रकारांमध्ये नवचैतन्य निर्माण झाले.
