✍️पांढरकवडा | अशफाक खान
राष्ट्रीय महामार्ग प्राधिकरणाच्या (NHIT) बोरखेडी–वडनेर–केळापूर प्रकल्पांतर्गत ‘सडक सुरक्षा महिना’ उपक्रमाच्या निमित्ताने आज दि. २१ जानेवारी २०२६ (बुधवार) रोजी उमरी रोडवरील वि.जा.भ. ज. माध्यमिक आश्रम शाळा, उमरी येथे व्यापक जनजागृती कार्यक्रमाचे आयोजन करण्यात आले. या कार्यक्रमाचा मुख्य उद्देश रस्ते अपघातांचे प्रमाण कमी करणे व ‘झिरो एक्सिडेंट’चे लक्ष्य साध्य करणे हा आहे.
कार्यक्रमादरम्यान विद्यार्थ्यांना रस्त्यावर चालताना घ्यावयाची काळजी, वाहन चालविताना पाळावयाचे नियम, हेल्मेट व सीटबेल्टचे महत्त्व, मोबाइलचा वापर टाळण्याची गरज, झेब्रा क्रॉसिंगचा उपयोग, सिग्नलचे पालन, अंध वळणांवरील खबरदारी आदी विषयांवर सविस्तर व सोप्या भाषेत मार्गदर्शन करण्यात आले. प्रत्यक्ष उदाहरणे देत संवादात्मक पद्धतीने माहिती दिल्यामुळे विद्यार्थ्यांमध्ये विशेष उत्साह दिसून आला.
या उपक्रमात सुमारे १०० ते १५० विद्यार्थी-विद्यार्थिनी सहभागी झाले होते. विद्यार्थ्यांनी विचारलेल्या प्रश्नांना तज्ज्ञांनी समर्पक उत्तरे देत रस्ते सुरक्षेबाबतची जाणीव अधिक ठोस केली. आयोजकांनी सांगितले की, देशभरात ‘झिरो एक्सिडेंट’चे उद्दिष्ट साध्य करण्यासाठी NHIT प्रकल्प अहोरात्र प्रयत्नशील असून, अशा जनजागृती कार्यक्रमांमुळे समाजात सकारात्मक बदल घडून येत आहे.
🎯 कार्यक्रमास उपस्थित मान्यवरांमध्ये
🔺इंजिनियर श्री. अनवर सर,
🔺सेफ्टी ऑफिसर श्री. मुनेश वर्मन,
🔺कंट्रोल रूम ऑफिसर श्री. युनूस खान,
🔺रूट पेट्रोलिंग ऑफिसर श्री. अभिजित कोटुरवार,
🔺पॅरामेडिक कु. पूजा जरोंडे,
🔺पॅरामेडिक श्री. विशाल आडे
यांचा समावेश होता. सर्व मान्यवरांनी विद्यार्थ्यांना मार्गदर्शन करत रस्ते सुरक्षा ही प्रत्येकाची सामूहिक जबाबदारी असल्याचे प्रतिपादन केले.
शाळेच्या वतीने या उपक्रमाचे स्वागत करत विद्यार्थ्यांच्या सुरक्षित भविष्यासाठी असे कार्यक्रम नियमितपणे व्हावेत अशी अपेक्षा व्यक्त करण्यात आली. कार्यक्रमाच्या शेवटी विद्यार्थ्यांनी रस्ते नियम पाळण्याची शपथ घेतली, ज्यामुळे उपक्रम अधिक प्रभावी ठरला.
हा कार्यक्रम केवळ माहितीपर न राहता, विद्यार्थ्यांच्या मनात सुरक्षिततेबाबत जागरूकता निर्माण करणारा प्रेरणादायी उपक्रम ठरल्याची भावना उपस्थितांनी व्यक्त केली.
