✍️पांढरकवडा: अशफाक खान
शहर व परिसरात वाढत्या मोटारसायकल चोरीच्या घटनांना आळा घालण्यासाठी पांढरकवडा पोलिसांनी प्रभावी कारवाई करत दोन सराईत आरोपींना अटक केली असून त्यांच्या ताब्यातून एकूण ४ मोटारसायकली जप्त करण्यात आल्या आहेत. या कारवाईत सुमारे १,५९,००० रुपयांचा मुद्देमाल हस्तगत करण्यात आला असून एकूण ४ मालमत्ता गुन्ह्यांचा छडा लावण्यात पोलिसांना यश आले आहे.
🎯 पहिली कारवाई – रेकॉर्डवरील आरोपीकडून ३ गुन्हे उघड
पोलीस स्टेशन पांढरकवडा येथे दाखल अपराध क्र. २९३/२०२६, कलम ३०३ (२) भारतीय न्याय संहिता (BNS) अंतर्गत चोरीस गेलेल्या मोटारसायकलचा तपास सुरू असताना पोलिसांनी तांत्रिक विश्लेषण व गोपनीय माहितीच्या आधारे रेकॉर्डवरील आरोपी राजु लक्ष्मण मंचलवार (वय ३४ वर्ष, रा. इंदिरा नगर, पांढरकवडा) यास ताब्यात घेतले.
चौकशीदरम्यान आरोपीने सदर गुन्ह्यातील मोटारसायकल चोरी केल्याची कबुली दिली. त्याच्या ताब्यातून संबंधित मोटारसायकल जप्त करण्यात आली. पुढील शिताफीने केलेल्या चौकशीत आरोपीने पांढरकवडा पोलीस स्टेशन हद्दीतून आणखी दोन मोटारसायकली चोरी केल्याचे उघड केले. पेट्रोल संपल्यामुळे त्या दुचाकी अज्ञात ठिकाणी सोडून दिल्याची माहिती दिल्यानंतर पोलिसांनी त्या दोन्ही मोटारसायकली शोधून काढल्या.
या कारवाईत एकट्या आरोपीकडून एकूण ३ गुन्हे उघडकीस आले.
🎯 दुसरी कारवाई – चोरीची दुचाकी जप्त, दुसरा आरोपी जेरबंद
यानंतर पोलीस स्टेशन पांढरकवडा येथे दाखल अपराध क्र. २७५/२०२६, कलम ३०३ (२) भारतीय न्याय संहिता अंतर्गत नोंद असलेल्या चोरीच्या गुन्ह्याचा तपास करताना पोलिसांनी तांत्रिक तपास व गोपनीय माहितीच्या आधारे विवेक अशोक चौधरी (वय ३४ वर्ष, रा. गणेशपूर वाई, ह. मु. आखाडा वार्ड, पांढरकवडा) यास ताब्यात घेतले.
त्याच्या ताब्यातून चोरीस गेलेली मोटारसायकल क्रमांक MH29 BG 5927, किंमत अंदाजे ५९,००० रुपये, हस्तगत करण्यात आली. त्यामुळे संबंधित गुन्हा उघडकीस आला आहे.
🎯 एकूण कारवाईचा आढावा
अटक आरोपी : २
जप्त मोटारसायकली : ४
एकूण किंमत : १,५९,००० रुपये
उघडकीस आलेले गुन्हे : ४
🎯 वरिष्ठांच्या मार्गदर्शनाखाली यशस्वी मोहीम
ही संपूर्ण कारवाई पोलीस अधीक्षक, यवतमाळ श्री. कुमार चिंता, अप्पर पोलीस अधीक्षक श्री. अशोक थोरात, सहाय्यक पोलीस अधीक्षक तथा उपविभागीय पोलीस अधिकारी पांढरकवडा श्री. रॉबिन बन्सल यांच्या मार्गदर्शनाखाली पार पडली.
पोलीस निरीक्षक पांढरकवडा श्री. एल. डी. तावरे यांच्या सूचनेनुसार गुन्हे शोध पथकातील पोउपनि नितीन सुशीर, प्रमोद जुनुनकर, पोहवा विलास जाधव, पोना सचिन काकडे, संदीप मडावी, सुनील राठोड व पो.कॉ. राजू मुत्यालवार यांनी विशेष परिश्रम घेत ही कारवाई यशस्वी केली.
🎯 नागरिकांना आवाहन
पांढरकवडा पोलिसांनी नागरिकांना आपली वाहने सुरक्षित स्थळी पार्क करण्याचे, लॉक व अतिरिक्त सुरक्षा साधनांचा वापर करण्याचे आवाहन केले आहे. संशयास्पद हालचाली आढळल्यास त्वरित पोलीस स्टेशनशी संपर्क साधावा, असेही आवाहन करण्यात आले आहे.
एल. डी. तावरे
पोलीस निरीक्षक
पोलीस स्टेशन पांढरकवडा
