✍️पांढरकवडा : अशफाक खान
राज्य शासनाच्या सार्वजनिक आरोग्य विभागाच्या वतीने देण्यात येणाऱ्या प्रतिष्ठेच्या “महाआरोग्य सन्मान २०२६” आणि “वंदनीय बाळासाहेब ठाकरे आरोग्यरत्न पुरस्कार” या दुहेरी सन्मानासाठी पांढरकवडा येथील उपजिल्हा रुग्णालयाची राज्यस्तरावर निवड करण्यात आली आहे. दि. २२ फेब्रुवारी २०२६ रोजी मुंबई येथे आयोजित भव्य पुरस्कार सोहळ्यात हा मानाचा पुरस्कार प्रदान करण्यात आला.
या सोहळ्यात राज्याचे आरोग्यमंत्री प्रकाश आबिटकर, आरोग्य राज्यमंत्री मेघना साकोरे-बोर्डीकर तसेच आरोग्य विभागाचे प्रधान सचिव ई. रविंद्रन, अभियान संचालक तथा आयुक्त डॉ. कादंबरी बालकवडे, संचालक (मुंबई) डॉ. नितीन अंबाडेकर आणि संचालक (पुणे) डॉ. विजय कांदेवाड यांची प्रमुख उपस्थिती होती.
रुग्णालयाच्या वतीने वैद्यकीय अधीक्षिका डॉ. वैशाली सातुरवार व अधिपरिचारिका श्रीमती शारदा चांदेकर यांनी पुरस्कार स्वीकारला. या प्रसंगी राज्यभरातील विविध आरोग्य संस्थांचे प्रतिनिधी उपस्थित होते.
🔺राज्यस्तरीय मूल्यमापनात द्वितीय क्रमांक
🔺एप्रिल २०२५ ते जानेवारी २०२६ या कालावधीत रुग्णालयाच्या कार्याचे सखोल मूल्यमापन करण्यात आले. यात खालील बाबींचा समावेश होता:
🔺बाह्यरुग्ण विभाग (OPD) सेवा
🔺आंतररुग्ण विभाग (IPD) सेवा
🔺मोठ्या व लहान शस्त्रक्रिया
🔺स्वाभाविक प्रसूती व सिझेरियन प्रसूती
🔺आपत्कालीन आरोग्य सेवा
🔺डिजिटल अहवाल प्रणालीची अचूकता
🔺सेवा गुणवत्तेची सातत्यपूर्ण जपणूक
🔺रुग्णसेवेतील तत्परता व पारदर्शकता
या सर्व निकषांवर उत्कृष्ट कामगिरी करत पांढरकवडा उपजिल्हा रुग्णालयाने १८.२ गुणांसह संपूर्ण महाराष्ट्रातून द्वितीय क्रमांक पटकावला. जिल्हा शल्य चिकित्सक व जिल्हा आरोग्य अधिकारी यांच्या अखत्यारीतील सर्व आरोग्य संस्थांचे राज्यस्तरीय मूल्यमापन करून हा पुरस्कार जाहीर करण्यात आला.
🎯 यशामागील संघभावना आणि नेतृत्व
या उल्लेखनीय यशामागे उपसंचालक, आरोग्य सेवा, अकोला मंडळ मा. डॉ. सुशील वाघचौरे, यवतमाळचे जिल्हा शल्य चिकित्सक मा. सुखदेव राठोड, निवासी वैद्यकीय अधिकारी डॉ. रमेश मांडण यांचे मार्गदर्शन लाभले.
तसेच वैद्यकीय अधीक्षिका डॉ. वैशाली सातुरवार यांच्या नेतृत्वाखाली सर्व वैद्यकीय अधिकारी, अधिपरिचारिका, परिचारक व इतर कर्मचाऱ्यांनी अत्यंत समर्पण, शिस्तबद्धता आणि जबाबदारीने कार्य पार पाडले. आधुनिक तंत्रज्ञानाचा वापर, डिजिटल नोंदींची अचूकता आणि रुग्णकेंद्रित सेवा यामुळेच रुग्णालयाला हा सन्मान प्राप्त झाला आहे.
🎯 सर्व स्तरांतून कौतुकाचा वर्षाव
या दुहेरी सन्मानामुळे पांढरकवडा परिसरात आनंदाचे वातावरण असून सर्व स्तरांतून रुग्णालयाचे अभिनंदन केले जात आहे. ग्रामीण व उपजिल्हा पातळीवर आरोग्यसेवा सक्षमपणे पुरविण्याचा आदर्श निर्माण करत पांढरकवडा उपजिल्हा रुग्णालयाने राज्यात आपली वेगळी ओळख निर्माण केली आहे.
हा पुरस्कार केवळ संस्थेचा सन्मान नसून, स्थानिक नागरिकांना मिळणाऱ्या दर्जेदार आणि विश्वासार्ह आरोग्य सेवेची राज्यस्तरीय पावती असल्याची भावना व्यक्त होत आहे.
