✍️पांढरकवडा: अशफाक खान
पांढरकवडा येथील उपजिल्हा रुग्णालय परिसरातील मागील तब्बल १२ वर्षांपासून बंद पडलेली विहीर पुन्हा कार्यान्वित करण्याचा स्तुत्य उपक्रम हाती घेण्यात आला असून, यामुळे रुग्णालयातील तीव्र पाणीटंचाईच्या समस्येला मोठा दिलासा मिळण्याची शक्यता निर्माण झाली आहे. शिवसेना (उद्धव बाळासाहेब ठाकरे) गटाचे माजी शहर प्रमुख संजय झोटिंग यांनी सामाजिक बांधिलकी जपत हा उपक्रम स्वतःच्या पुढाकारातून व स्वखर्चाने सुरू केला आहे.
या कामासाठी त्यांनी उपजिल्हा रुग्णालयाच्या वैद्यकीय अधीक्षक डॉ. वैशाली सातूरवार तसेच संदीप दीपक जाजुलवार यांच्या सहकार्याने विहिरीची पाहणी करून स्वच्छता मोहिमेला सुरुवात केली आहे. सध्या विहिरीतील गाळ काढणे, कचरा हटवणे आणि परिसर स्वच्छ ठेवण्याचे काम युद्धपातळीवर सुरू आहे.
🎯 १२ वर्षांपासून बंद होती विहीर
उपजिल्हा रुग्णालय परिसरातील ही विहीर गेल्या अनेक वर्षांपासून पूर्णपणे बंद अवस्थेत होती. सततच्या दुर्लक्षामुळे विहिरीत मोठ्या प्रमाणात गाळ, कचरा, झाडाझुडपे आणि मातीचा साठा झाला होता. परिणामी ही विहीर वापरण्यायोग्य राहिली नव्हती.
दरम्यान, रुग्णालयात सध्या फक्त एकच बोरवेल कार्यरत असल्यामुळे रुग्णालयातील दैनंदिन कामकाजासाठी आवश्यक असलेल्या पाण्याचा तुटवडा प्रकर्षाने जाणवत आहे. वाढती रुग्णसंख्या आणि उन्हाळ्याच्या पार्श्वभूमीवर पाण्याची गरज अधिक वाढण्याची शक्यता असल्याने ही विहीर पुन्हा सुरू करणे अत्यंत गरजेचे झाले होते.
🎯 ट्रामा केअर व डायलेसिस केंद्रासाठी पाण्याची मोठी गरज
पांढरकवडा उपजिल्हा रुग्णालयात सन २०१४ मध्ये ट्रामा केअर सेंटरची इमारत उभारण्यात आली. मात्र आवश्यक वैद्यकीय यंत्रसामग्री व डॉक्टरांच्या अभावामुळे हे केंद्र अद्याप सुरू होऊ शकलेले नाही. भविष्यात हे केंद्र सुरू झाल्यास मोठ्या प्रमाणात पाण्याची आवश्यकता भासणार आहे.
तसेच सध्या रुग्णालयात सुरू असलेल्या डायलेसिस सेंटरसाठीही मोठ्या प्रमाणात पाण्याची गरज असते. त्यामुळे पर्यायी व शाश्वत पाण्याचा स्रोत उपलब्ध करणे अत्यंत आवश्यक बनले आहे. अशा परिस्थितीत बंद पडलेली विहीर पुन्हा सुरू करण्याचा हा उपक्रम अत्यंत महत्त्वाचा मानला जात आहे.
🎯 तीन दिवसांपासून स्वच्छता मोहिम जोमात
गेल्या तीन दिवसांपासून विहिरीतील गाळ उपसणे, कचरा काढणे आणि परिसराची साफसफाई करण्याचे काम सातत्याने सुरू आहे. हा संपूर्ण उपक्रम स्वखर्चातून राबविण्यात येत असल्यामुळे नागरिकांकडून संजय झोटिंग यांच्या कार्याचे कौतुक केले जात आहे.
स्थानिक नागरिक आणि काही स्वयंसेवकही या मोहिमेत सहभागी होत असून, सामाजिक बांधिलकीची जाणीव ठेवून हा उपक्रम राबविण्यात येत असल्याने त्याचे सर्वत्र स्वागत होत आहे.
🎯 प्रशासनाकडे पूर्वीपासून मागणी
दरम्यान, रुग्णालयाच्या वैद्यकीय अधीक्षक डॉ. वैशाली सातूरवार यांनी यापूर्वीही या विहिरीच्या दुरुस्ती व स्वच्छतेसाठी नगरपरिषदेला पत्र देऊन कार्यवाहीची मागणी केली होती. मात्र प्रशासनाकडून अद्याप कोणतीही ठोस पावले उचलण्यात आली नसल्याची माहिती समोर आली आहे.
या संदर्भात नगरपरिषदेच्या मुख्याधिकाऱ्यांनी हा विषय त्यांच्या कार्यक्षेत्रात येत नसल्याचे सांगून जबाबदारी टाळल्याची चर्चा देखील परिसरात सुरू आहे.
🎯 नगरपरिषदेकडून लवकरच ठराव?
दरम्यान, नवनिर्वाचित नगरपरिषद अध्यक्ष सोनु बोरेले यांनी या प्रश्नाकडे गांभीर्याने पाहत लवकरच नगरपरिषदेत ठराव घेऊन पुढील कार्यवाही करण्यात येईल, असे आश्वासन दिले असल्याची माहिती मिळाली आहे.
🎯 रुग्णसेवेला मोठा दिलासा
सदर विहीर पूर्णपणे स्वच्छ करून पुन्हा सुरू झाल्यास उपजिल्हा रुग्णालयातील पाणीटंचाईची समस्या मोठ्या प्रमाणात कमी होईल. रुग्णालयातील रुग्ण, त्यांच्या नातेवाईकांसह वैद्यकीय सेवेसाठी आवश्यक असलेले पाणी सहज उपलब्ध होणार असल्याने रुग्णसेवेला मोठा दिलासा मिळण्याची अपेक्षा व्यक्त केली जात आहे.
सामाजिक जाणिवेतून आणि सार्वजनिक हित लक्षात घेऊन संजय झोटिंग यांनी घेतलेला हा पुढाकार शहरासाठी प्रेरणादायी ठरत असून, भविष्यात अशा उपक्रमांमधून सार्वजनिक समस्यांवर मार्ग काढण्याची नवी दिशा मिळू शकते, अशी भावना नागरिकांमधून व्यक्त होत आहे.
