✍️पांढरकवडा: अशफाक खान
पांढरकवडा पोलीस स्टेशनच्या पथकाने गोवंश तस्करीविरोधात धडक कारवाई करत दोन वाहनांमधून बेकायदेशीरपणे नेण्यात येणाऱ्या जनावरांची सुटका केली आहे. या कारवाईत सुमारे ८.९० लाख रुपयांचा मुद्देमाल जप्त करण्यात आला असून तिघा आरोपींविरुद्ध विविध कायद्यांन्वये गुन्हा दाखल करण्यात आला आहे. या घटनेमुळे राष्ट्रीय महामार्गावरून सुरू असलेल्या गोवंश तस्करीच्या प्रकारांवर पुन्हा एकदा प्रश्नचिन्ह निर्माण झाले आहे.
🎯 गोपनीय माहितीवरून कारवाई
दिनांक १ एप्रिल २०२६ रोजी पांढरकवडा पोलीस पथकाला गोपनीय बातमीदारामार्फत माहिती मिळाली की, राष्ट्रीय महामार्ग क्र. ४४ वरून हिंगनघाटकडून तेलंगणातील आदिलाबादकडे दोन वाहनांमधून गोवंशीय जनावरांची कत्तलीसाठी वाहतूक सुरू आहे. या माहितीच्या आधारे पोलिसांनी तत्काळ वाय पॉईंट परिसरात नाकाबंदी केली.
🎯 संशयित वाहनांची तपासणी
नाकाबंदी दरम्यान पोलिसांनी एक टाटा एस चारचाकी आणि एक बोलेरो पिकअप वाहन थांबवून तपासणी केली. या तपासणीत दोन्ही वाहनांमध्ये प्रत्येकी दोन अशा एकूण चार गोवंशीय बैल जातीची जनावरे अत्यंत दाटीवाटीने, दोरखंडाने बांधून उभी करण्यात आल्याचे आढळले. जनावरांना बसण्यासाठी, पाणी पिण्यासाठी किंवा सुरक्षिततेसाठी कोणतीही व्यवस्था करण्यात आलेली नव्हती. तसेच वाहतुकीसंबंधी कोणतेही अधिकृत परवाने किंवा माहिती फलकही वाहनांवर आढळले नाहीत.
🎯 आरोपींची कबुली
वाहन चालकांकडे चौकशी केली असता त्यांनी ही जनावरे धोत्रा (ता. जि.वर्धा) येथील धिरज गजानन मोहुर्ले यांच्या सांगण्यावरून आदिलाबाद येथील बाजारात कत्तलीसाठी नेत असल्याचे कबूल केले. यामुळे हा प्रकार नियोजित गोवंश तस्करीचा असल्याचे स्पष्ट झाले.
🎯 जप्त मुद्देमाल
या कारवाईत पोलिसांनी खालीलप्रमाणे मुद्देमाल जप्त केला आहे:
🔺बोलेरो पिकअप (MH 33 T 2771) – अंदाजे किंमत ₹४,००,०००
🔺टाटा एस वाहन (MH 32 Q 4582) – अंदाजे किंमत ₹३,००,०००
🔺दोन मोबाईल फोन – अंदाजे किंमत ₹३०,०००
🔺चार गोवंशीय जनावरे – अंदाजे किंमत ₹१,६०,०००
🔺एकूण जप्ती: ₹८,९०,०००
🎯 आरोपींविरुद्ध गुन्हा
या प्रकरणी पोलिसांनी खालील आरोपींविरुद्ध गुन्हा नोंदविला आहे:
🔻शुभम चंद्रशेखर किरपाल (वय २५, चालक)
🔻राहुल प्रल्हाद सोनुले (वय ३४, चालक)
🔻धिरज गजानन मोहुर्ले (वय २३, ट्रान्सपोर्ट व्यवसाय) तिघेही रा.धोत्रा ता. जि. वर्धा
त्यांच्यावर भारतीय न्याय संहितेचे कलम ४९ तसेच प्राण्यांवरील क्रूरता प्रतिबंधक अधिनियम १९६० आणि महाराष्ट्र प्राणी संरक्षण (सुधारणा) अधिनियम १९९५ अंतर्गत विविध कलमांन्वये गुन्हा दाखल करण्यात आला आहे.
🎯 वरिष्ठांच्या मार्गदर्शनाखाली कारवाई
ही कारवाई पोलीस अधीक्षक यवतमाळ श्री. कुमार चिंता, अपर पोलीस अधीक्षक श्री. अशोक थोरात आणि उपविभागीय पोलीस अधिकारी श्री. रांबिन बन्सल यांच्या मार्गदर्शनाखाली पार पडली. तसेच पांढरकवडा पोलीस स्टेशनचे निरीक्षक श्री. लहु तावरे यांच्या नेतृत्वात सहाय्यक पोलीस निरीक्षक सागर पेंढारकर, पोलीस शिपाई विकेश ध्यावतींवार आणि इतर कर्मचाऱ्यांनी ही मोहीम यशस्वी केली.
🎯 वाढत्या तस्करीवर लगाम आवश्यक
या घटनेमुळे राष्ट्रीय महामार्गावरून होणाऱ्या गोवंश तस्करीच्या घटनांमध्ये वाढ होत असल्याचे पुन्हा एकदा अधोरेखित झाले आहे. अशा प्रकारांवर कठोर कारवाई करून जनावरांचे संरक्षण करण्याची गरज व्यक्त होत असून, पोलिसांनी पुढील काळातही अशीच धडक मोहीम सुरू ठेवावी अशी अपेक्षा व्यक्त करण्यात येत आहे .
