धारणा शिवारात २९ वर्षीय युवकाचा संशयास्पद मृत्यू; दिल्लीहून केरळ ला जाणाऱ्या तरुणाचा गूढ अंत

✍️पांढरकवडा: अशफाक खान

पांढरकवडा तालुक्यातील धारणा शिवारात एका २९ वर्षीय तरुणाचा संशयास्पद मृत्यू झाल्याची धक्कादायक घटना उघडकीस आली आहे. या घटनेमुळे परिसरात एकच खळबळ उडाली असून, मृत्यूचे नेमके कारण अद्याप अस्पष्ट असल्याने विविध तर्क-वितर्कांना उधाण आले आहे.
मृत तरुणाचे नाव रोहित चंद्रन (वय २९, रा. श्रीवराहम, जि. तिरुवनंतपुरम, केरळ) असे असून, तो दिल्ली येथे स्वतःचे रेस्टॉरंट चालवत होता. हॉटेल मॅनेजमेंटचा अभ्यासक्रम पूर्ण केल्यानंतर त्याने राजधानी दिल्लीत व्यवसाय उभारला होता.

🎯 प्रवासादरम्यान घडली दुर्दैवी घटना
मिळालेल्या माहितीनुसार, रोहित चंद्रन हा १ एप्रिल रोजी आपल्या कुटुंबीयांना आपण दिल्लीहून केरळकडे कारने निघाल्याची माहिती देऊन प्रवासाला निघाला होता. तो आपल्या मारुती सुझुकी जिम्नी (केएल ०१ सीवाय ९६४१) या चारचाकी वाहनाने एकटाच प्रवास करत होता.
दरम्यान, २ एप्रिल रोजी दुपारी सुमारे १.३० वाजताच्या सुमारास पांढरकवड्याजवळील धारणा गावातील साई सुमन पेट्रोल पंपाच्या शेजारी तो मृतावस्थेत आढळून आला. त्याची कार पंपासमोर उभी असल्याचेही निदर्शनास आले.

🎯 मृतदेहाजवळ संशयास्पद वस्तू
घटनास्थळी रोहितच्या मृतदेहाजवळ शिलाजीतसदृश पदार्थाचा एक डबा आढळून आला आहे. या बाबीमुळे मृत्यू अधिकच संशयास्पद वाटत असून, पोलिसांनी या पदार्थाची तपासणी करण्यासाठी नमुने जप्त केले आहेत.

🎯 कुटुंबीयांचा अंदाज – हृदयविकाराचा झटका?
या घटनेची माहिती मिळताच रोहितचे मोठे बंधू राहुल चंद्रन नायर (सॉफ्टवेअर इंजिनिअर) तसेच इतर नातेवाईक केरळहून तातडीने पांढरकवड्यात दाखल झाले आहेत. प्राथमिक माहितीनुसार, रोहितचा मृत्यू हृदयविकाराच्या झटक्याने झाला असावा, असा अंदाज त्याच्या c
पांढरकवडा पोलिसांनी या प्रकरणी अकस्मात मृत्यूची नोंद (ADR) केली असून, पुढील तपास पोलीस उपनिरीक्षक रघुपती यांच्या मार्गदर्शनाखाली सुरू आहे. घटनास्थळाचा पंचनामा करण्यात आला असून, परिसरातील सीसीटीव्ही फुटेजही तपासले जात आहे.

🎯 शवविच्छेदन अहवालावर सर्वांचे लक्ष
रोहित चंद्रन यांच्या मृतदेहाचे शवविच्छेदन करण्यात आले असून, त्याचा अहवाल आल्यानंतरच मृत्यूचे नेमके कारण स्पष्ट होणार आहे. विषबाधा, नैसर्गिक मृत्यू किंवा इतर कोणतेही कारण याबाबत पोलिस सर्व अंगांनी तपास करत आहेत.

🎯 परिसरात चर्चांना उधाण
एकट्याने लांब प्रवास करत असताना अचानक मृत्यू झाल्यामुळे स्थानिकांमध्ये विविध चर्चा सुरू आहेत. विशेषतः मृतदेहाजवळ सापडलेल्या पदार्थामुळे संशय अधिकच वाढला आहे.

🎯(अपडेट अपेक्षित):
शवविच्छेदन अहवाल व रासायनिक विश्लेषणानंतर या प्रकरणातील खरी कारणमीमांसा समोर येण्याची शक्यता असून, पोलिस तपासाच्या निष्कर्षाकडे सर्वांचे लक्ष लागले आहे.