✍️पांढरकवडा:प्रतिनीधी
दि. 15 एप्रिल रोजी जाहीर झालेल्या केंद्रीय माध्यमिक शिक्षण मंडळाच्या (CBSE) दहावीच्या परीक्षेच्या निकालात पांढरकवडा येथील गुरुकुल इंग्लिश मिडीयम स्कूलचा विद्यार्थी मुंतझीम खान याने उल्लेखनीय यश संपादन करत 91.4 टक्के गुण मिळवून उत्तीर्ण होण्याचा मान मिळवला आहे. त्याच्या या उज्ज्वल यशामुळे परिसरात आनंदाचे वातावरण निर्माण झाले असून सर्व स्तरातून त्याच्यावर अभिनंदनाचा वर्षाव होत आहे.
मुंतझीम खान हा पांढरकवडा वनविभागात राऊंड ऑफिसर म्हणून कार्यरत असलेले इझहार खान इसाक खान यांचा एकुलता एक मुलगा आहे. त्यांचे कुटुंब येथील आशियाना लेआऊट परिसरात वास्तव्यास असून, शैक्षणिक वातावरणात वाढलेल्या मुंतझीमने सातत्यपूर्ण अभ्यास, शिस्तबद्ध दिनचर्या आणि शिक्षकांच्या मार्गदर्शनाच्या बळावर हे यश संपादन केले आहे.
लहानपणापासूनच अभ्यासात प्राविण्य मिळवणारा आणि जिज्ञासू वृत्ती असलेला मुंतझीम हा शाळेतील एक होतकरू व हुशार विद्यार्थी म्हणून ओळखला जातो. त्याच्या या यशामुळे शाळेचे नावही उज्ज्वल झाले असून, गुरुकुल इंग्लिश मिडीयमच्या शिक्षकवृंदांनी त्याचे विशेष कौतुक केले आहे.
या यशाबद्दल बोलताना मुंतझीम खान याने सांगितले की, “नियमित अभ्यास, वेळेचे योग्य नियोजन आणि पालक-शिक्षकांचे मार्गदर्शन यामुळेच मला हे यश मिळाले. पुढे मला वैद्यकीय क्षेत्रात करिअर करायचे असून डॉक्टर बनण्याचे माझे स्वप्न आहे.”
मुंतझीमच्या या यशाबद्दल त्याचे पालक, नातेवाईक, मित्रमंडळी यांनी अभिनंदन केले असून, पुढील शैक्षणिक वाटचालीसाठी शुभेच्छा दिल्या आहेत.
