पाटणबोरीत गोवंशीय जनावरांची मोठी सुटका; दोन दिवसांत दोन कारवाया, ९ लाखांहून अधिक मुद्देमाल जप्त

✍️पांढरकवडा : अशफाक खान

केळापूर तालुक्यातील पाटणबोरी परिसरात गोवंशीय जनावरांच्या अवैध वाहतुकीवर पांढरकवडा पोलिसांनी सलग दोन धडक कारवाया करत मोठा पर्दाफाश केला आहे. कत्तलीसाठी नेली जात असलेली जनावरे जप्त करत पोलिसांनी एकूण 16 जनावरे व सुमारे ९ लाख रुपयांहून अधिक किमतीचा मुद्देमाल हस्तगत केला असून सहा आरोपींविरुद्ध गुन्हे दाखल करण्यात आले आहेत. या कारवाईमुळे परिसरात मोठी खळबळ उडाली आहे.

🎯 पहिली कारवाई : १३ जनावरे वाचवली, पाच आरोपी ताब्यात
दि. २७ एप्रिल २०२६ रोजी पहाटे १.५७ वाजता डायल ११२ वरून मिळालेल्या गोपनीय माहितीनुसार पाटणबोरी–मांडवी मार्गावरील पुलाजवळील हनुमान मंदिर परिसरात पोलिसांनी सापळा रचला.
पोलीस उपनिरीक्षक सचिन रघुपती व त्यांच्या पथकाने घटनास्थळी धाव घेतली असता अविनाश माधव कोरवते, दिलीप सूर्यभान कनाके, प्रकाश शिवराम आडे व संजय वासुदेव मडावी हे चार जण १३ गोवंशीय जनावरे पायदळ नेताना आढळले. चौकशीत ही जनावरे शेख जुम्मा शेख हसन  रा.पाटणबोरी यांची असल्याचे समोर आले.

🎯 तपासादरम्यान उघड झाले की:
जनावरांचे तोंड व पाय दोऱ्यांनी घट्ट बांधलेले होते
चारा व पाण्याची कोणतीही व्यवस्था नव्हती
जनावरांना अत्यंत अमानुष वागणूक देण्यात येत होती
जनावरे तेलंगणातील आदिलाबाद येथे कत्तलीसाठी नेली जात होती
पोलिसांनी पंचनामा करून १३ जनावरे (किंमत १,३८,००० रुपये) व ३ मोबाईल (१०,००० रुपये) असा एकूण १,४८,००० रुपयांचा मुद्देमाल जप्त केला.
जप्त जनावरे चैतन्य गोरक्षण बहुउद्देशीय संस्था, मांडवी (बोरी) येथे सुरक्षित ठेवण्यात आली आहेत.
या प्रकरणी पाच आरोपींविरुद्ध महाराष्ट्र पशु संरक्षण अधिनियम १९७६, प्राणी क्रूरता प्रतिबंधक अधिनियम १९६० तसेच बीएनएस कलम ३(५), ४९ अन्वये गुन्हा दाखल करण्यात आला असून पुढील तपास पोहेकॉ राम राठोड करीत आहेत.

🎯 दुसरी कारवाई : NH-44 वर पिकअपसह ७.५६ लाखांचा मुद्देमाल जप्त
याआधी दि. २६ एप्रिल रोजी सायंकाळी ६ वाजताच्या सुमारास पांढरकवडा–पाटणबोरी दरम्यान NH-44 वर पेट्रोलिंग दरम्यान पोलिसांनी आणखी एक मोठी कारवाई केली.
MH 27 X 7199 या पिकअप वाहनातून तीन बैलांना अमानुष पद्धतीने कोंबून अदिलाबादकडे नेले जात असल्याची माहिती मिळताच ढोकी गावाजवळ वाहन अडवण्यात आले.

🎯 तपासात आढळले की:
जनावरांना आखूड दोरीने घट्ट बांधलेले होते
चारा-पाण्याची कोणतीही सोय नव्हती
आवश्यक कागदपत्रे व पशुवैद्यकीय प्रमाणपत्र नव्हते
वाहन चालक रमेश किसन पाटील (वय ५४, रा. सावरगाव, ता. घाटंजी) याच्याविरुद्ध गुन्हा दाखल करण्यात आला आहे.
या कारवाईत:
🔺३ बैल (किंमत ५६,००० रुपये)
🔺पिकअप वाहन (किंमत ७,००,००० रुपये)
असा एकूण ७.५६ लाख रुपयांचा मुद्देमाल जप्त करण्यात आला.
जप्त जनावरे नगर परिषद कोंडवाडा, पांढरकवडा येथे ठेवण्यात आली असून त्यांची पशुवैद्यकीय तपासणी करण्यात येत आहे. पुढील तपास पोलीस कॉन्स्टेबल किशोर आडे करीत आहेत.

🎯 कायदेशीर कारवाई व वाढती सतर्कता
दोन्ही प्रकरणांमध्ये महाराष्ट्र प्राणी संरक्षण अधिनियम १९७६ (सुधारित १९९५) व प्राणी क्रूरता प्रतिबंधक कायदा १९६० अंतर्गत गुन्हे दाखल करण्यात आले आहेत.
पोलिसांनी नागरिकांना आवाहन केले आहे की, गोवंशीय जनावरांची संशयास्पद वाहतूक दिसल्यास त्वरित माहिती द्यावी. या सलग कारवायांमुळे पांढरकवडा परिसरात अवैध जनावर वाहतुकीवर मोठा आळा बसण्याची शक्यता व्यक्त केली जात आहे.

🎯 विशेष: दोन दिवसांत झालेल्या या कारवायांमुळे पोलिसांची सतर्कता आणि जलद प्रतिसाद यंत्रणा पुन्हा एकदा अधोरेखित झाली असून, गोवंशीय जनावरांच्या संरक्षणासाठी प्रशासन अधिक कठोर पावले उचलत असल्याचे स्पष्ट झाले आहे.