✍️झरीजामनी : अशफाक खान
तालुक्यातील सर्व शेतकरी बांधवांना आधुनिक शेतीकडे वाटचाल करण्यासाठी डिजिटल माध्यमांचा अधिकाधिक वापर करण्याचे आवाहन तालुका कृषी अधिकारी, झरीजामनी यांच्या वतीने करण्यात आले आहे. बदलत्या हवामानामुळे आणि कृषी तंत्रज्ञानातील वाढत्या प्रगतिमुळे पिकांचे नियोजन, रोग-कीड नियंत्रण, खत व्यवस्थापन, बाजारभाव माहिती आणि शासनाच्या विविध योजना याविषयी अद्ययावत माहिती मिळणे अत्यंत आवश्यक झाले आहे.
कृषी विभागाने शेतकऱ्यांसाठी तयार केलेले महाविस्तार ॲप हे याच गरजांची पूर्तता करणारे सर्वसमावेशक डिजिटल साधन आहे. या ॲपच्या माध्यमातून शेतकऱ्यांना त्यांच्या शेतीशी संबंधित सर्व तांत्रिक माहिती एका ठिकाणी सहज आणि जलद मिळू शकते.
🎯 महाविस्तार ॲपची उपयुक्त वैशिष्ट्ये
🔺पिकांची सविस्तर माहिती: प्रत्येक हंगामानुसार पिकांच्या लागवड पद्धती, तण नियंत्रण, रोग-कीड व्यवस्थापन, वाढीच्या टप्प्यांनुसार शिफारसी.
🔺खत व पाणी व्यवस्थापन सल्ला: नियोजित खत डोस, सिंचनाचे वेळापत्रक आणि पावसाच्या आधारे सूचना.
🔺फवारणीसाठी मार्गदर्शन: कोणत्या टप्प्यावर कोणती फवारणी आवश्यक, प्रमाण, वेळ आणि काळजीसूचना.
🔺शासनाच्या योजनांची माहिती: पीकविमा, अनुदान योजना, खत वितरण, कृषी यंत्रसामग्री अनुदान यांसारख्या विविध शासकीय योजनांचा लाभ घेण्यासाठी आवश्यक माहिती व मार्गदर्शन.
🔺चॅटबॉट सुविधा: शेतीविषयक तात्काळ प्रश्नांची जलद उत्तरे.
🔺पिकांचे पूर्वनियोजन ते विक्रीपर्यंत मदत: लागवड ते कापणी आणि बाजारात विक्रीपर्यंतचा सविस्तर तांत्रिक मार्गदर्शक.
🎯 शेतकऱ्यांनी कसा करावा वापर?
शेतकरी बांधवांनी फार्मर आयडी किंवा मोबाईल नंबर वापरून महाविस्तार ॲप सहजपणे इन्स्टॉल करून नोंदणी करू शकतात. नोंदणी केल्यानंतर प्रत्येक शेतकरी आपल्या पिकानुसार, शेताच्या ठिकाणानुसार आणि हंगामानुसार वैयक्तिकृत सूचना प्राप्त करू शकतो.
🎯 उत्पादनवाढीसाठी डिजिटल शेती हा काळाचा माग
कृषी विभागाच्या वतीने सांगण्यात आले की, पिकांचे उत्पादन वाढवण्यासाठी आणि शेती अधिक शाश्वत करण्यासाठी तांत्रिक माहितीचा वापर अत्यंत गरजेचा आहे. महाविस्तार ॲप हे त्यासाठीचे सर्वात प्रभावी साधन असून, याचा वापर केल्यास शेतकऱ्यांना नियोजनबद्ध शेती करणे सोपे होते.
🎯 कृषी विभागाचे आवाहन
“तालुक्यातील सर्व शेतकरी बांधवांनी महाविस्तार ॲपचा जरूर वापर करावा. शेतीशी संबंधित माहिती, मार्गदर्शन आणि शासकीय योजना एका क्लिकवर उपलब्ध होत असल्याने डिजिटल साधनांचा वापर करा आणि आपल्या उत्पादनक्षमतेत वाढ करा,” असे आवाहन तालुका कृषी अधिकारी, झरीजामनी यांच्या वतीने करण्यात आले आहे.
