✍️झरी : अशफाक खान
वणी नगरपरिषदेचे माजी नगरसेवक राजू उर्फ राजेश वामनराव डफ (वय ५४) यांचे बुधवारी दुपारी झालेल्या भीषण दुचाकी अपघातात दुःखद निधन झाले. या अचानक घडलेल्या घटनेमुळे वणी शहरासह संपूर्ण परिसरात तीव्र हळहळ व्यक्त केली जात असून, राजकीय व सामाजिक क्षेत्रात शोककळा पसरली आहे.
अपघाताची सविस्तर माहिती
मिळालेल्या माहितीनुसार, राजू डफ हे बुधवारी सकाळी आपल्या स्प्लेंडर दुचाकीने काही वैयक्तिक कामासाठी झरीजामणी येथे गेले होते. काम आटोपून ते दुपारी वणीच्या दिशेने परत येत असताना दुपारी सुमारे ३ ते ३.३० वाजण्याच्या दरम्यान जामणी–शेकापूर मार्गावरील मुच्ची गावाजवळील एका वळणावर त्यांची दुचाकी अचानक घसरली. नियंत्रण सुटल्याने ते रस्त्याच्या कडेला जोरात फेकले गेले.
या अपघातात त्यांच्या डोक्याला व चेहऱ्याला गंभीर दुखापत झाली. अपघात इतका भीषण होता की, त्यांचा जागीच मृत्यू झाला, अशी माहिती प्रत्यक्षदर्शी ग्रामस्थांनी दिली. अपघाताची माहिती मिळताच स्थानिक नागरिकांनी तत्काळ मदतीचा प्रयत्न केला; मात्र तोपर्यंत उशीर झाला होता.
पोलीस कारवाई आणि पुढील प्रक्रिया
घटनेची माहिती मिळताच पाटण पोलीस तात्काळ घटनास्थळी दाखल झाले. पंचनामा करून मृतदेह शवविच्छेदनासाठी झरी येथील ग्रामीण रुग्णालयात पाठविण्यात आला. अपघाताचे नेमके कारण काय, याचा पुढील तपास पोलीस करत आहेत.
🎯 राजकीय व सामाजिक प्रवास
राजू डफ यांचा राजकीय प्रवास उल्लेखनीय राहिला आहे. महाराष्ट्र नवनिर्माण सेनेची वणी नगरपरिषदेवर सत्ता असताना ते स्वीकृत सदस्य म्हणून नगरपरिषदेवर निवडून गेले होते. त्या काळात त्यांनी नगरपरिषदेत सक्रिय सहभाग नोंदवत विविध विषयांवर भूमिका मांडली होती. मधल्या काही काळात ते राजकारणापासून काहीसे अलिप्त राहिले होते.
मात्र, नुकत्याच पार पडलेल्या नगरपरिषद निवडणुकीत त्यांनी राष्ट्रवादी काँग्रेस (शरदचंद्र पवार गट) पक्षाकडून नगरसेवक पदासाठी निवडणूक लढवली होती. या निवडणुकीत त्यांचा पराभव झाला असला, तरी ते सामाजिक वर्तुळात सतत सक्रिय होते.
🎯 मिलनसार व्यक्तिमत्त्व, मोठा मित्रपरिवार
अत्यंत मिलनसार स्वभाव, स्पष्टवक्तेपणा आणि मोठा मित्रपरिवार ही त्यांची ओळख होती. वणी शहरात ते सर्वसामान्य नागरिकांपासून राजकीय नेत्यांपर्यंत सर्वांना परिचित होते. त्यांच्या अकाली निधनाने अनेकांनी हळहळ व्यक्त केली असून, सामाजिक माध्यमांवरही श्रद्धांजलीचे संदेश व्यक्त होत आहेत.
🎯 कुटुंबीयांवर दुःखाचा डोंगर
राजू डफ यांच्या पश्चात पत्नी, एक मुलगा, एक मुलगी आणि भाऊ असा मोठा आप्तपरिवार आहे. त्यांच्या अकाली जाण्याने कुटुंबीयांवर दुःखाचा डोंगर कोसळला आहे.
शोक व्यक्त
त्यांच्या निधनावर विविध राजकीय पक्षांचे नेते, नगरपरिषदेचे माजी व विद्यमान पदाधिकारी, तसेच सामाजिक कार्यकर्त्यांनी शोक व्यक्त केला आहे. वणी शहराने एक परिचित आणि मनमिळावू व्यक्तिमत्त्व गमावल्याची भावना नागरिक व्यक्त करत आहेत.
