✍️वणी | प्रतिनिधी
सुशगंगा कॉलेज ऑफ फार्मसी, वणी येथील विद्यार्थ्यांनी सामाजिक भान जपत अपंग निवासी कर्मशाळा, वणी येथे मंगळवार, दि. १३ जानेवारी २०२६ रोजी अभ्यासपूर्ण भेट दिली. या उपक्रमाचा मुख्य उद्देश दिव्यांग व्यक्तींना भेडसावणाऱ्या सामाजिक, शैक्षणिक व वैयक्तिक अडचणींचे सखोल आकलन करून घेणे, तसेच त्यांना सहकार्य व सक्षम पाठबळ देण्याचे मार्ग शोधणे हा होता.
या भेटीदरम्यान विद्यार्थ्यांनी अपंग शाळेतील विद्यार्थ्यांशी मनमोकळा संवाद साधला. केवळ त्यांच्या दैनंदिन दिनचर्येचे निरीक्षण न करता, त्यांच्या वैयक्तिक गरजा, भावनिक बाजू, शिकण्यातील अडथळे आणि जीवनातील संघर्ष यांबाबत समजून घेण्याचा प्रयत्न करण्यात आला. तसेच अपंग निवासी कर्मशाळेत सुरू असलेल्या विविध शैक्षणिक, कौशल्यविकासात्मक व पुनर्वसनात्मक उपक्रमांचे प्रत्यक्ष निरीक्षण विद्यार्थ्यांनी केले.
विद्यार्थ्यांनी शिक्षकांशीही संवाद साधून दिव्यांग विद्यार्थ्यांसाठी वापरल्या जाणाऱ्या अनुकूल तंत्रज्ञान (Assistive Technology), विशेष अध्यापन पद्धती आणि संसाधने यांची माहिती घेतली. या भेटीमुळे विद्यार्थ्यांमध्ये सामाजिक संवेदनशीलता वाढीस लागली असून, भविष्यात आरोग्य व औषधनिर्माण क्षेत्रात कार्य करताना दिव्यांग व्यक्तींच्या गरजांकडे अधिक सजगतेने पाहण्याची प्रेरणा मिळाली.
अपंग निवासी कर्मशाळेचे गृहपाल श्री. संतोष नामदेवराव किंगरे यांनी विद्यार्थ्यांना मौलिक मार्गदर्शन केले. दिव्यांगांच्या सर्वांगीण विकासासाठी चालविण्यात येणाऱ्या उपक्रमांची माहिती देत त्यांनी समाजातील प्रत्येक घटकाने अशा उपक्रमांमध्ये सहभागी व्हावे, असे आवाहन केले.
या अभ्यासपूर्ण भेटीचे नेतृत्व सुशगंगा कॉलेज ऑफ फार्मसी, वणी येथील प्राचार्य श्री. सुनिल बी. पवार यांनी केले. तसेच महाविद्यालयाच्या हेड ऑफ डिपार्टमेंट मिस शिवानी पोचमपल्लीवार यांनी या उपक्रमासाठी परवानगी व सहकार्य दिल्याबद्दल निवासी कर्मशाळेच्या वतीने त्यांचे विशेष आभार व्यक्त करण्यात आले. या भेटीत शिक्षक, शिक्षकेत्तर कर्मचारी तसेच विद्यार्थ्यांचा उत्स्फूर्त सहभाग लाभला.
ही भेट केवळ शैक्षणिक उपक्रम न राहता, मानवी संवेदना, सामाजिक जबाबदारी आणि सेवाभाव यांची जाणीव करून देणारा प्रेरणादायी अनुभव ठरला, अशी भावना उपस्थित विद्यार्थ्यांनी व्यक्त केली.
