✍️वणी: प्रतिनीधी
वणी शहरात पैशाच्या वादातून एका तरुणाचा त्याच्याच मित्राने लोखंडी सळईने डोक्यावर वार करून निर्घृण खून केल्याची धक्कादायक घटना उघडकीस आली आहे. या प्रकरणी वणी पोलीस स्टेशनमध्ये भारतीय न्याय संहिता (BNS) कलम 103(1) अंतर्गत गुन्हा दाखल करण्यात आला असून आरोपीस अटक करण्यात आली आहे. न्यायालयाने आरोपीस एक दिवसाची पोलीस कोठडी (PCR) सुनावली आहे.
🎯 घटनेचा सविस्तर तपशील
दिनांक 18/02/2026 रोजी रात्री सुमारे 09.30 वाजताच्या सुमारास, वणी शहरातील बोकडे पेट्रोल पंपाजवळील संजय ऑटोमोबाईल दुकानासमोर ही थरारक घटना घडली.
फिर्यादी राजेश संजय नेरकुंटलावार (वय 22, व्यवसाय मजूर, रा. दामलेफेअर, वणी) यांनी दिलेल्या तक्रारीनुसार, त्यांचे मोठे भाऊ मल्लेश संजय नेरकुंटलावार (वय 24) आणि आरोपी मंगेश उर्फ भुऱ्या विलास डाखरे (वय 26, रा. पळसोनी, वणी) हे जिवलग मित्र होते.
काही दिवसांपूर्वी दोघे पश्चिम मध्यप्रदेश येथे फिरायला गेले होते. त्या वेळी मल्लेश यांनी मंगेश यास ₹7000/- रक्कम दिली होती. मात्र ती रक्कम खर्च केल्याने मंगेश ती परत देण्यास टाळाटाळ करत होता. याच कारणावरून दोघांमध्ये वाद निर्माण झाला होता. दि. 18 फेब्रुवारी रोजी दुपारीही त्यांच्यात तीव्र बाचाबाची झाली होती आणि दोघांनी एकमेकांना जीवे मारण्याची धमकी दिल्याची माहिती समोर आली आहे.
🎯 प्रत्यक्ष घटनेचा थरार
घटनेच्या वेळी फिर्यादी राजेश हे बालाजी ट्रॅव्हल्स कार्यालयात कामावर होते. त्यावेळी त्यांना नातेवाईक रितिक लक्ष्मण मामीडवार यांचा फोन आला की, आरोपी मंगेश हा मल्लेश यास संजय ऑटोमोबाईलच्या शटरसमोर मारहाण करत आहे. राजेश घटनास्थळी पोहोचले असता त्यांनी पाहिले की, आरोपी मंगेश उर्फ भुऱ्या हा हातात लोखंडी सळई घेऊन मल्लेश यांच्या डोक्यावर जोरदार वार करत होता. या हल्ल्यात मल्लेश यांच्या डोक्याला गंभीर दुखापत झाली. परिसरातील नागरिकांची गर्दी जमू लागल्याचे पाहून आरोपी घटनास्थळावरून पळून गेला.
🎯 वैद्यकीय उपचार व मृत्यू
घटनेची माहिती मिळताच पोलिस कर्मचारी सचिन वांढरे यांनी तातडीने घटनास्थळी धाव घेतली. जखमी अवस्थेत असलेल्या मल्लेश यांना त्वरित शासकीय रुग्णालयात हलविण्यात आले. मात्र डॉक्टरांनी तपासून त्यांना मृत घोषित केले. या घटनेमुळे वणी शहरात खळबळ उडाली असून परिसरात भीतीचे वातावरण निर्माण झाले आहे.
🎯 पोलीस कारवाई
फिर्यादी राजेश नेरकुंटलावार यांच्या तक्रारीवरून वणी पोलीस स्टेशन येथे आरोपी मंगेश उर्फ भुऱ्या विलास डाखरे याच्याविरुद्ध भारतीय न्याय संहिता (BNS) कलम 103(1) अंतर्गत खुनाचा गुन्हा दाखल करण्यात आला. वणी पोलिसांनी तातडीने तपासाची सूत्रे हाती घेत आरोपीस अटक केली. आज न्यायालयात हजर केले असता न्यायालयाने आरोपीस एक दिवसाची पोलीस कोठडी (PCR) मंजूर केली आहे.
🎯 वरिष्ठ अधिकाऱ्यांचे मार्गदर्शन
ही संपूर्ण कारवाई मा. एसडीपीओ श्री. सुरेश दळवे व वणीचे ठाणेदार श्री. गोपाल उंबरकर यांच्या मार्गदर्शनाखाली पार पडली. या तपासात API प्रियंका चौधरी, कपील पाटील, दत्ता पेंडकर, PSI सुयोग महापुरे, सुदाम आसोरे, शुभम महानवर तसेच वणी पोलीस स्टेशनचे इतर कर्मचारी सहभागी होते.
🎯 पुढील तपास
या प्रकरणाचा पुढील तपास API प्रियंका चौधरी मॅडम यांच्या मार्गदर्शनाखाली सुरू असून, हत्येस वापरलेले शस्त्र जप्त करणे, घटनेचे प्रत्यक्षदर्शी साक्षीदारांचे जबाब नोंदविणे तसेच घटनेमागील नेमका हेतू व पूर्वनियोजन होते का याचा तपास केला जात आहे.
🎯 सामाजिक प्रश्न
अवघ्या ₹7000 च्या वादातून एका तरुणाचा जीव जाण्याची ही घटना समाजासाठी गंभीर इशारा मानली जात आहे. किरकोळ आर्थिक वाद, राग आणि अहंकार यामुळे वाढणारी हिंसक प्रवृत्ती चिंताजनक असल्याचे नागरिकांमध्ये बोलले जात आहे.
