✍️पांढरकवडा : अशफाक खान
पांढरकवडा-नागपूर राष्ट्रीय महामार्ग क्रमांक 44 वरील साखरा उड्डाणपुलावर सोमवारी (20 जुलै) दुपारी सुमारे 3.30 वाजण्याच्या सुमारास झालेल्या भीषण अपघातात टाटा 407 मिनी ट्रक चालकाचा जागीच मृत्यू झाला, तर त्याचा 18 वर्षीय मुलगा किरकोळ जखमी झाला. ट्रक आणि टाटा 407 यांच्यात झालेल्या समोरासमोरच्या धडकेमुळे महामार्गावर काही काळ वाहतूक विस्कळीत झाली होती.
मृत चालकाचे नाव दिनेश नारायणराव मुत्यलवार (वय अंदाजे 55 वर्षे, रा. शास्त्री वार्ड, पांढरकवडा) असे असून, ते सार्वजनिक वितरण व्यवस्थेअंतर्गत (रेशन) धान्य घेऊन टाटा 407 (क्र. MH-12 FD-9440) मधून ग्राम मंगी (करंजी परिसर) येथे जात होते. त्यांच्यासोबत त्यांचा मुलगा कृष्णा दिनेश मुत्यलवार (वय 18) हा देखील वाहनात होता.
🎯 रॉंग साईडने घेतलेल्या वळणामुळे घडला भीषण अपघात
प्राथमिक माहितीनुसार, साखरा उड्डाणपुलावरून जात असताना टाटा 407 मधील ज्वारीची काही पोती रस्त्यावर पडली. ती पोती परत घेण्यासाठी चालक दिनेश मुत्यलवार यांनी उड्डाणपुलावरच वाहन रॉंग साईडने वळविण्याचा प्रयत्न केला. त्याचवेळी हैदराबादहून नागपूरच्या दिशेने आपल्या मार्गाने येत असलेल्या RJ-11 GB-3925 क्रमांकाच्या ट्रकची टाटा 407 ला समोरासमोर जोरदार धडक बसली.
धडक इतकी भीषण होती की टाटा 407 चा पुढील भाग पूर्णपणे चेंदामेंदा झाला. चालक दिनेश मुत्यलवार हे केबिनमध्ये गंभीररीत्या अडकले आणि त्यांचा घटनास्थळीच मृत्यू झाला. तर त्यांचा मुलगा कृष्णा याला किरकोळ दुखापत झाली असून त्याच्यावर उपचार करण्यात आले.
🎯 तातडीने बचावकार्य
अपघाताची माहिती मिळताच करंजी महामार्ग पोलीस मदत केंद्राचे पथक, आपत्कालीन राखीव ॲम्बुलन्स आणि इतर मदत यंत्रणा तात्काळ घटनास्थळी दाखल झाल्या. क्रेनच्या साहाय्याने दोन्ही वाहने वेगळी करण्यात आली. त्यानंतर केबिनमध्ये अडकलेला मृतदेह बाहेर काढून शवविच्छेदनासाठी पांढरकवडा येथील उपजिल्हा रुग्णालयात पाठविण्यात आला. जखमी कृष्णा मुत्यलवार यालाही तातडीने उपचारासाठी रुग्णालयात हलविण्यात आले.
🎯 महामार्गावरील वाहतूक काही काळ ठप्प
अपघातानंतर राष्ट्रीय महामार्ग क्रमांक 44 वरील वाहतूक काही काळ विस्कळीत झाली होती. पोलिसांनी आणि महामार्ग मदत पथकाने तातडीने वाहने बाजूला करून वाहतूक सुरळीत केली.
🎯 ट्रक चालकाची माहिती
अपघातातील ट्रक (क्र. RJ-11 GB-3925) असून पुढील चौकशी पोलिसांकडून सुरू आहे.
🎯 पोलिसांकडून तपास सुरू
घटनेची नोंद करून पोलिसांनी अपघाताचा तपास सुरू केला आहे. प्राथमिक तपासात रॉंग साईडने वाहन वळविल्यामुळे अपघात झाल्याचे समोर येत असले, तरी अपघाताचे नेमके कारण तपासाअंती स्पष्ट होणार आहे.
🎯 हळहळ व्यक्त
दिनेश मुत्यलवार यांच्या आकस्मिक निधनामुळे पांढरकवडा परिसरात शोककळा पसरली आहे. त्यांच्या पश्चात पत्नी, एक विवाहित मुलगी आणि एक मुलगा असा परिवार असून, त्यांच्या निधनामुळे कुटुंबावर दुःखाचा डोंगर कोसळला आहे. स्थानिक नागरिकांनीही या घटनेबद्दल तीव्र हळहळ व्यक्त केली आहे.
