⛔ सोलर कृषी पंपांच्या प्रलंबित अर्जांपासून जुन्या डिमांडच्या परताव्यापर्यंत विविध प्रश्नांवर आमदार संजयभाऊ देरकर यांची अधिकाऱ्यांकडे थेट विचारणा
✍️वणी : महेश टिपले
मारेगाव तालुक्यातील शेतकरी व नागरिकांच्या विविध वीजविषयक समस्या जाणून घेण्यासाठी आमदार संजयभाऊ देरकर यांच्या माध्यमातून महावितरणच्या कामांचा आढावा घेणारी बैठक मारेगाव येथे घेण्यात आली. या बैठकीत घरगुती तसेच कृषी वीजपुरवठा, सोलर कृषी पंप, प्रलंबित वीज जोडण्या, जुन्या डिमांडची रक्कम, स्मार्ट मीटर आणि इतर प्रलंबित प्रश्नांवर महावितरणच्या अधिकाऱ्यांसोबत सविस्तर चर्चा करण्यात आली.
बैठकीत सोलर कृषी पंपांच्या प्रलंबित अर्जांचा मुद्दा विशेष चर्चेत राहिला. मारेगाव तालुक्यात मोठ्या संख्येने शेतकऱ्यांनी सोलर पंपासाठी अर्ज केले असून, संबंधित एजन्सीकडून पंप उपलब्ध करून देण्यास विलंब होत असल्याच्या तक्रारी शेतकऱ्यांनी मांडल्या. शासनाच्या संबंधित नियमांनुसार निर्धारित कालावधीत सोलर पंप उपलब्ध न झाल्यास संबंधित एजन्सीवर दंडात्मक कारवाईची तरतूद असल्याचे बैठकीत नमूद करण्यात आले.
याबाबत आमदार संजयभाऊ देरकर यांनी महावितरणच्या अधिकाऱ्यांकडे थेट विचारणा केली. त्यावर आजपर्यंत कोणत्याही एजन्सीवर अशा प्रकारची दंडात्मक कारवाई करण्यात आलेली नसल्याची माहिती अधिकाऱ्यांनी दिली. त्यामुळे प्रलंबित सोलर पंपांच्या प्रश्नावर पुढील कार्यवाहीबाबतही चर्चा करण्यात आली.
🎯 जुन्या डिमांडच्या रकमेचा प्रश्न
अनेक शेतकऱ्यांनी यापूर्वी कृषी वीजपंपासाठी महावितरणकडे डिमांडची रक्कम भरली होती. त्यानंतर कृषी पंप जोडणीची प्रक्रिया पुढे न जाता शेतकऱ्यांना सोलर पंप घेण्यास सांगण्यात आले. मात्र, पूर्वी भरलेली डिमांडची रक्कम अद्याप परत मिळालेली नसल्याच्या तक्रारी शेतकऱ्यांनी मांडल्या.
शेतकऱ्यांची आर्थिक अडचण होऊ नये आणि जुन्या डिमांडच्या रकमेबाबत योग्य ती कार्यवाही करण्यात यावी, यासाठी या विषयावर संबंधित अधिकाऱ्यांकडून माहिती घेण्यात आली.
🎯 स्मार्ट मीटरबाबतही नागरिकांचे प्रश्न
स्मार्ट मीटरच्या मुद्द्यावरही बैठकीत नागरिकांनी प्रश्न उपस्थित केले. स्मार्ट मीटर बसविणे बंधनकारक नसल्याचे शासनाकडून सांगितले जात असताना, महावितरणकडे इतर प्रकारचे मीटर उपलब्ध नसल्याने ग्राहकांना स्मार्ट मीटर बसविण्याची परिस्थिती निर्माण होत असल्याच्या तक्रारी नागरिकांनी मांडल्या.
याबाबत महावितरणच्या अधिकाऱ्यांकडून वस्तुस्थिती जाणून घेण्यात आली आणि नागरिकांच्या शंकांवर चर्चा करण्यात आली.
🎯 घरगुती व कृषी वीजपुरवठ्याच्या विविध समस्यांवर चर्चा
बैठकीत मारेगाव तालुक्यातील घरगुती वीज ग्राहक, शेतकरी, वीजपुरवठा, प्रलंबित वीज जोडण्या, कृषी पंप तसेच इतर वीजविषयक समस्यांचा आढावा घेण्यात आला. नागरिक आणि शेतकऱ्यांनी आपापल्या समस्या थेट अधिकाऱ्यांसमोर मांडल्याने अनेक प्रलंबित बाबी प्रशासनाच्या निदर्शनास आणून देण्यात आल्या.
आमदार संजयभाऊ देरकर यांनी नागरिकांच्या समस्या गांभीर्याने घेऊन प्रलंबित प्रश्नांवर तातडीने कार्यवाही करण्याच्या सूचना संबंधित अधिकाऱ्यांना दिल्या. मोठ्या स्वरूपाच्या समस्या देखील प्राधान्याने सोडविण्याचे निर्देश यावेळी देण्यात आले.
तसेच, बैठकीत झालेल्या चर्चेनंतर संबंधित विभागाकडून करण्यात आलेल्या कार्यवाहीचा पुढील महिन्यात पुन्हा आढावा घेण्यात येणार असल्याचे सांगण्यात आले.
या आढावा बैठकीमुळे मारेगाव तालुक्यातील शेतकरी आणि नागरिकांना आपल्या वीजविषयक समस्या थेट महावितरणच्या अधिकाऱ्यांसमोर मांडण्यासाठी व्यासपीठ उपलब्ध झाले. त्यामुळे प्रलंबित प्रश्न प्रशासनाच्या निदर्शनास आणून देण्यासोबतच त्यांच्या निराकरणासाठी पुढील पाठपुराव्याचा मार्गही मोकळा झाला आहे.
🎯 अधिकारी, पदाधिकारी व शेतकऱ्यांची उपस्थिती
यावेळी महावितरणचे कार्यकारी अभियंता पांढरकवडा संजया खंगार, उपअभियंता संतोष लोहे, कनिष्ठ अभियंता निलेश काकडे, कनिष्ठ अभियंता ज्युही वाघमारे, सहाय्यक अभियंता अतुल आत्राम, मारेगाव नगरपंचायतीचे नगराध्यक्ष मनीष मस्की, माजी जिल्हा परिषद सदस्य अनिल दरेकर, तालुका प्रमुख पुरुषोत्तम बुट्टे, मारेगाव शहर प्रमुख अभय चौधरी, संपर्कप्रमुख सचिन पचारे, देवा बोबडे, युवा सेना तालुका प्रमुख करण किंगरे यांच्यासह महावितरणचे अधिकारी, पदाधिकारी आणि शेतकरी उपस्थित होते.
