✍️मारेगाव: अशफाक खान
तालुक्यातील करणवाडी ते कुंभा रोडवर घरगुती गॅस सिलेंडरचे अयोग्यरीत्या व अवैध पद्धतीने वाटप सुरू असल्याचा धक्कादायक प्रकार उघडकीस आला असून, या प्रकरणी कारवाई करत एकूण 4 लाख 30 हजार 740 रुपयांचा मुद्देमाल जप्त केला आहे. या कारवाईमुळे परिसरात एकच खळबळ उडाली आहे.
या प्रकरणी जिवनावश्यक वस्तू अधिनियम 1955 च्या कलम 3 व 7 अंतर्गत गुन्हा नोंद करण्यात आला आहे. फिर्यादी म्हणून मारेगावचे प्रभारी पुरवठा निरीक्षक तथा नायब तहसीलदार श्री. विजय दिगांबर मत्ते यांनी लेखी तक्रार दिली आहे.
आरोपी कोण?
🎯 या प्रकरणात दोन आरोपींना पोलिसांनी नामनिर्देशित केले आहे:
🔺महेश हरीदास कावाडे (वय 32, रा. नवरगाव, ता. मारेगाव) – वाहन चालक
🔺धम्मपाल चोखाजी दारूडें (वय 49, रा. मारेगाव) – HP गॅस एजन्सी ग्रामीण वितरक
घटनेचा तपशील
दि. 22 एप्रिल 2026 रोजी दुपारी 12:15 वाजता करणवाडी ते कुंभा रोडवर, वणी–करंजी हायवेपासून सुमारे 100 मीटर अंतरावर, MH 29 BE 2737 क्रमांकाचे बोलेरो पिकअप वाहन उभे करून त्यातून HP कंपनीचे गॅस सिलेंडर थेट नागरिकांना वितरित केले जात असल्याचे निदर्शनास आले. ही वितरण प्रक्रिया नियमानुसार नसून अयोग्य ठिकाणी होत असल्याचे आढळले.
याबाबत तात्काळ पंचनामा करून वाहन चालक व संबंधित एजन्सी मालकाचे जबाब नोंदविण्यात आले. चौकशीत गॅस सिलेंडरचे वितरण नियमबाह्य पद्धतीने होत असल्याचे स्पष्ट झाल्याने तहसीलदारांनी गुन्हा नोंदविण्याचे आदेश दिले.
🎯 जप्त केलेला मुद्देमाल
कारवाईदरम्यान खालीलप्रमाणे मुद्देमाल जप्त करण्यात आला:
20 रिकामे गॅस सिलेंडर – किंमत ₹30,740
20 भरलेले गॅस सिलेंडर – किंमत ₹50,000
बोलेरो पिकअप वाहन – किंमत ₹3,50,000
एकूण जप्ती: ₹4,30,740
गुन्हा नोंद व पुढील तपास
या प्रकरणी मारेगाव पोलीस ठाण्यात गुन्हा दाखल करण्यात आला आहे. पुढील तपास पोलीस निरीक्षक शाम वानखडे यांच्या मार्गदर्शनाखाली सुरू आहे.
