✍️ वणी | प्रतिनिधी
झरी तालुक्यातील मुकुटबन येथे कार्यरत असलेल्या ‘आरसीसीपीएल’ (RCCPL) सिमेंट कंपनीतील कामगारांच्या अमानुष छळाचा गंभीर प्रकार समोर आला असून, प्रचंड उष्णतेत काम करणाऱ्या कामगारांच्या जिवाशी खेळ सुरू असल्याचा आरोप महाराष्ट्र नवनिर्माण सेनेने केला आहे. विदर्भात सध्या तापमानाने ४६ अंश सेल्सिअसचा टप्पा गाठला असताना, कंपनीच्या अतिउष्ण ‘पॅकिंग प्लांट’मध्ये स्थानिक कामगारांकडून जीव धोक्यात घालून काम करून घेतले जात असल्याने संतापाची लाट उसळली आहे.
या पार्श्वभूमीवर मनसे नेते राजू उंबरकर यांच्या नेतृत्वाखाली गुरुवार दि. २२ मे २०२६ रोजी कंपनी प्रशासनाविरोधात आक्रमक भूमिका घेत आंदोलन करण्यात आले. कामगारांच्या विविध ज्वलंत प्रश्नांवरून मनसे पदाधिकाऱ्यांनी कंपनी प्रशासनाला थेट धारेवर धरत तीव्र नाराजी व्यक्त केली.
🎯 भट्टीसारख्या प्लांटमध्ये जीव धोक्यात घालून काम
माहितीनुसार, RCCPL कंपनीच्या पॅकिंग प्लांटमध्ये सिमेंटच्या गोण्या भरण्याचे काम अत्यंत कठीण आणि धोकादायक मानले जाते. बाहेर ४६ अंश तापमान असताना प्लांटच्या आत उष्णतेची तीव्रता आणखी वाढत असून, सिमेंटची धूळ, घुसमटणारे वातावरण आणि उष्ण वाऱ्यांमुळे कामगार अक्षरशः हैराण झाले आहेत. अनेक कामगारांना श्वास घेण्यास त्रास होत असून, आरोग्यावर गंभीर परिणाम होत असल्याची माहिती समोर आली आहे.
सर्वात धक्कादायक बाब म्हणजे एवढ्या तीव्र उष्णतेत काम करणाऱ्या कामगारांसाठी कंपनीकडून मूलभूत सुविधांची देखील व्यवस्था करण्यात आलेली नव्हती. पंखे, कुलर, शुद्ध पिण्याचे थंड पाणी किंवा प्राथमिक वैद्यकीय सुविधा नसल्याने कामगारांमध्ये प्रचंड संताप निर्माण झाला आहे.
🎯 कामगारांना रस्त्यावर बसून करावे लागते जेवण
कंपनीच्या आवारात कामगारांसाठी कोणतीही रेस्ट रूम किंवा विश्रांती गृह उपलब्ध नसल्याचे आंदोलनादरम्यान उघड झाले. इतकेच नव्हे तर कामगारांसाठी कॅन्टीनचीही सुविधा नसल्याने भर उन्हात रस्त्याच्या कडेला बसून जेवण करण्याची वेळ कामगारांवर आली आहे. घामाने चिंब झालेल्या अवस्थेत कामगारांना मूलभूत मानवी सुविधांपासूनही वंचित ठेवण्यात येत असल्याने हा प्रकार संतापजनक असल्याची प्रतिक्रिया व्यक्त होत आहे.
🎯 स्थानिक मराठी कामगारांना डावलल्याचा आरोप
या आंदोलनातील आणखी एक गंभीर मुद्दा म्हणजे स्थानिक कामगारांवर होत असलेला कथित अन्याय. मनसेच्या आरोपानुसार, बाहेरील राज्यांमधून कामगार आणून कंपनीत त्यांना प्राधान्य दिले जात आहे, तर अनेक वर्षांपासून प्रामाणिकपणे काम करणाऱ्या स्थानिक मराठी भूमिपुत्रांना जाणीवपूर्वक कामावरून कमी केले जात आहे.
यामुळे स्थानिक बेरोजगार तरुणांमध्ये तीव्र नाराजी असून, “महाराष्ट्रात उद्योग उभे करायचे, येथील संसाधनांचा वापर करायचा आणि इथल्याच मराठी माणसाला डावलायचे, हे सहन केले जाणार नाही,” असा इशारा मनसेकडून देण्यात आला.
🎯 “मनसे स्टाईलने चक्काजाम करू” – राजू उंबरकर
यावेळी मनसे नेते राजू उंबरकर यांनी कंपनी प्रशासनावर जोरदार हल्लाबोल करत कठोर शब्दांत इशारा दिला.
त्यांनी म्हटले की,
“महाराष्ट्राच्या मातीत उद्योग करायचा, येथील पाणी, जमीन आणि संसाधने वापरायची; पण इथल्याच मराठी कामगारांना रस्त्यावर आणायचे, ही हुकूमशाही मनसे कधीही खपवून घेणार नाही. पॅकिंग प्लांटसारख्या धोकादायक ठिकाणी काम करणाऱ्या कामगारांसाठी तातडीने थंड पिण्याचे पाणी, कुलर, वैद्यकीय सुविधा आणि इतर आवश्यक सोयी उपलब्ध करून द्याव्यात. स्थानिक कामगारांना न्याय न मिळाल्यास मनसे स्टाईलने कंपनीचे चक्काजाम आंदोलन करण्यात येईल.”
🎯 आंदोलनाचा तात्काळ परिणाम; कंपनी प्रशासनाची धावपळ
मनसेच्या आक्रमक आंदोलनानंतर RCCPL कंपनी प्रशासनाचे धाबे दणाणले. आंदोलनानंतर तातडीने पॅकिंग प्लांट परिसरात कुलर बसविणे तसेच थंड पिण्याच्या पाण्याची व्यवस्था करण्यात आल्याची माहिती मिळाली आहे. मात्र, कामगारांच्या इतर मागण्या अद्याप प्रलंबित असल्याने हा लढा पुढेही सुरू राहणार असल्याचा निर्धार मनसे पदाधिकाऱ्यांनी व्यक्त केला.
🎯 कामगारांच्या हक्कांसाठी लढा सुरूच राहणार
कामगारांना सुरक्षित कामाचे वातावरण, वैद्यकीय सुविधा, विश्रांती कक्ष, कॅन्टीन, स्थानिकांना रोजगारात प्राधान्य आणि मानवतावादी वागणूक मिळेपर्यंत आंदोलन मागे घेतले जाणार नाही, असा स्पष्ट इशारा मनसे कामगार सेनेकडून देण्यात आला आहे.
या आंदोलनावेळी मनसे कामगार सेना, स्थानिक पदाधिकारी, कार्यकर्ते आणि मोठ्या संख्येने कामगार उपस्थित होते. या संपूर्ण प्रकरणामुळे मुकुटबन परिसरात RCCPL कंपनीच्या कारभाराविरोधात तीव्र नाराजीचे वातावरण निर्माण झाले आहे.
