✍️यवतमाळ : अशफाक खान
पालकमंत्री संजय राठोड यांच्या संकल्पनेतून तसेच मृद व जलसंधारण विभागाच्या वतीने शुक्रवारी (दि. २१ ऑगस्ट २०२६) यवतमाळ येथे महा वॉकथॉन स्पर्धेचे आयोजन करण्यात आले होते. या स्पर्धेला नागरिकांचा उत्स्फूर्त प्रतिसाद मिळाला. विविध क्षेत्रांतील सहभागींच्या उपस्थितीत पार पडलेल्या या वॉकथॉनमध्ये केळापूर तालुक्यातील पिंपरी (बोरी) गावचे माजी सरपंच तथा शिवसेनेचे विभागप्रमुख गजानन गंड्रतवार यांनी उल्लेखनीय कामगिरी करत चतुर्थ क्रमांक पटकावला.
गंड्रतवार यांच्या या कामगिरीबद्दल त्यांना ३ हजार रुपयांचे रोख पारितोषिक प्रदान करण्यात आले. जिल्हाधिकारी विकास मीना यांच्या हस्ते मंचावर गजानन गंड्रतवार यांचा सत्कार करून त्यांना पारितोषिक देण्यात आले. या गौरवामुळे पिंपरी (बोरी) गावासह केळापूर तालुक्यातील नागरिकांमध्ये आनंदाचे वातावरण निर्माण झाले आहे.
मृद व जलसंधारण विभागाच्या माध्यमातून आयोजित करण्यात आलेल्या या महा वॉकथॉनचा उद्देश नागरिकांमध्ये आरोग्य, व्यायाम, शारीरिक तंदुरुस्ती तसेच सामाजिक सहभागाबाबत जागरूकता निर्माण करणे हा होता. स्पर्धेत सहभागी झालेल्या नागरिकांनी उत्साहाने सहभाग नोंदवत आरोग्यदायी जीवनशैलीचा संदेश दिला.
गजानन गंड्रतवार हे पिंपरी (बोरी) गावचे माजी सरपंच असून, सध्या शिवसेनेचे विभागप्रमुख म्हणून कार्यरत आहेत. सामाजिक व सार्वजनिक उपक्रमांमध्ये सक्रिय सहभाग घेणाऱ्या गंड्रतवार यांनी महा वॉकथॉनमध्ये चौथा क्रमांक मिळवत आपल्या गावाचे नाव यवतमाळ जिल्ह्याच्या पातळीवर उज्ज्वल केले.
या महा वॉकथॉनमध्ये हरिहर लिंगनवार, राजुदास जाधव, जयवंत बंडेवार, राकेश नेमनवार आणि निलेश आडे यांनीही उत्स्फूर्त सहभाग नोंदविला. स्पर्धेच्या निमित्ताने सहभागी झालेल्या सर्वांमध्ये उत्साहाचे वातावरण पाहायला मिळाले.
गंड्रतवार यांच्या यशाबद्दल पिंपरी (बोरी) परिसरातील नागरिक, मित्रपरिवार आणि शिवसेनेच्या पदाधिकाऱ्यांकडून त्यांचे अभिनंदन करण्यात येत आहे. आरोग्य आणि सामाजिक सहभागाचा संदेश देणाऱ्या महा वॉकथॉनमध्ये मिळविलेला हा सन्मान त्यांच्या कार्याची आणि उत्साहाची दखल घेणारा ठरला आहे.
