⛔ डॉ. बाबासाहेब आंबेडकर वाचनालयाच्या दुरुस्तीचे ६० टक्के काम पूर्ण; उर्वरित काम आठ दिवसांत पूर्ण करण्याचे मुख्याधिकाऱ्यांचे आश्वासन
✍️वणी : प्रतिनीधी
डॉ. बाबासाहेब आंबेडकर वाचनालयाची दुरुस्ती, पुनर्व्यवस्था करून ते नागरिकांसाठी तातडीने सुरू करावे, या मागणीसाठी आंबेडकरी समाज आक्रमक झाला होता. १५ ऑगस्टपूर्वी वाचनालय सुरू न झाल्यास आमरण उपोषण करण्याचा इशारा भीम आर्मी भारत एकता मिशनच्या वतीने देण्यात आला होता. या आंदोलनाची प्रशासनाने गंभीर दखल घेत अखेर वाचनालयाच्या कामाला गती दिली आहे. नगर परिषद प्रशासनाकडून मिळालेल्या लेखी आश्वासनानंतर १५ ऑगस्टपासून सुरू होणारे आमरण उपोषण तूर्तास स्थगित करण्यात आले आहे.
वणी नगर परिषदेचे मुख्याधिकारी सचिन गाडे यांनी आज, दि. १४ ऑगस्ट रोजी संबंधितांशी चर्चा करून वाचनालयाच्या दुरुस्ती व पुनर्व्यवस्थेबाबत सुरू असलेल्या कामाची माहिती दिली. वाचनालयाच्या दुरुस्तीचे काम कंत्राटदाराला आदेश देऊन सुरू करण्यात आले असून आतापर्यंत सुमारे ६० टक्के काम पूर्ण झाले आहे. उर्वरित काम येत्या आठ दिवसांत पूर्ण करण्यात येणार असल्याचे प्रशासनाकडून स्पष्ट करण्यात आले आहे.
यासोबतच वाचनालयासाठी आवश्यक पुस्तके आणि रॅक उपलब्ध करून देण्याचा प्रस्ताव खनिज विकास निधीतून सादर करण्यात येणार असल्याचेही मुख्याधिकाऱ्यांनी कळविले आहे. त्यामुळे वाचनालयाची केवळ इमारत दुरुस्त न करता आवश्यक साहित्य उपलब्ध करून ते पूर्ण क्षमतेने सुरू करण्याच्या दृष्टीने प्रशासनाकडून कार्यवाही केली जाणार असल्याचे दिसून येत आहे.
🎯 दीड-दोन वर्षांपासून पाठपुरावा
डॉ. बाबासाहेब आंबेडकर वाचनालयाच्या दुरुस्ती व पुनःप्रारंभासाठी दि. २४ नोव्हेंबर २०२४ पासून सातत्याने पाठपुरावा करण्यात येत असल्याचे भीम आर्मी भारत एकता मिशनच्या वतीने सांगण्यात आले होते. मात्र, वारंवार आश्वासने मिळूनही प्रत्यक्ष कामाला अपेक्षित गती मिळत नसल्याने आंबेडकरी समाजात नाराजी निर्माण झाली होती.
वाचनालय सुरू करण्याच्या मागणीसाठी भीम आर्मी भारत एकता मिशनचे जिल्हाध्यक्ष रवींद्र उर्फ बबलू भाऊ मेश्राम यांच्या नेतृत्वाखाली नगर परिषद प्रशासनाला निवेदन देण्यात आले होते. वाचनालयाची दुरुस्ती, पुनर्व्यवस्था, परिसराची स्वच्छता तसेच वाचनालयासमोरील अतिक्रमणाचा प्रश्न निकाली काढून ते नागरिकांसाठी खुले करण्याची मागणी करण्यात आली होती.
🎯 १५ ऑगस्टची डेडलाईन; आमरण उपोषणाचा इशारा
वाचनालयासमोरील अतिक्रमण हटवून परिसराची आवश्यक व्यवस्था पूर्ण करावी आणि १५ ऑगस्ट २०२६ पूर्वी डॉ. बाबासाहेब आंबेडकर वाचनालय जनतेसाठी सुरू करावे, अशी ठाम भूमिका संघटनेने घेतली होती. मागणी पूर्ण न झाल्यास दि. १५ ऑगस्टपासून वणी येथे आमरण उपोषण करण्याचा इशारा जिल्हाध्यक्ष बबलूभाऊ मेश्राम यांनी दिला होता.
तसेच, आंदोलनामुळे कायदा व सुव्यवस्थेचा प्रश्न निर्माण झाल्यास त्याची संपूर्ण जबाबदारी प्रशासनाची राहील, असा इशाराही निवेदनातून देण्यात आला होता. निवेदनाच्या प्रती उपविभागीय पोलीस अधिकारी, वणी तसेच वणी पोलीस ठाण्यालाही देण्यात आल्या होत्या.
🎯 प्रशासनाच्या पत्रानंतर आंदोलनाला स्थगिती
दरम्यान, नगर परिषद प्रशासनाने दिलेल्या लेखी पत्रात वाचनालयाच्या दुरुस्तीचे काम सुरू असून ६० टक्के काम पूर्ण झाले आहे आणि उर्वरित काम आठ दिवसांत पूर्ण करण्यात येईल, असे नमूद केले आहे. तसेच पुस्तके व रॅक उपलब्ध करून देण्यासाठी खनिज विकास निधीतून प्रस्तावित कार्यवाही करण्यात येणार असल्याचेही स्पष्ट करण्यात आले आहे.
प्रशासनाच्या या लेखी आश्वासनामुळे आंबेडकरी समाजाच्या वतीने १५ ऑगस्टपासून करण्यात येणारे आमरण उपोषण तूर्तास स्थगित करण्यात आले आहे. मात्र, प्रशासनाने दिलेले आश्वासन प्रत्यक्षात कितपत आणि किती वेगाने पूर्ण होते, याकडे आता सर्वांचे लक्ष लागले आहे.
डॉ. बाबासाहेब आंबेडकर यांच्या नावाने असलेले हे वाचनालय केवळ एक वास्तू नसून वणी शहरातील विद्यार्थी, युवक आणि वाचकांसाठी ज्ञानाचे केंद्र आहे. त्यामुळे दुरुस्तीचे काम पूर्ण करून लवकरात लवकर वाचनालय नागरिकांसाठी खुले करावे, अशी अपेक्षा आंबेडकरी समाजासह शहरातील नागरिकांकडून व्यक्त होत आहे.
आता प्रशासनाने दिलेल्या आठ दिवसांच्या मुदतीत उर्वरित काम पूर्ण करून वाचनालय प्रत्यक्षात सुरू केले जाते का, याकडे वणीकरांचे लक्ष लागले आहे.
