✍️वणी : महेश टिपले
वणी तालुक्यातील क्रीडा स्पर्धांना दि. १५ सप्टेंबर २०२६ पासून सुरुवात झाली असून, विविध क्रीडा प्रकारांमध्ये विद्यार्थी आपले कौशल्य पणाला लावत आहेत. या स्पर्धांमध्ये बुद्धिबळ या क्रीडा प्रकारात वणी लायन्स इंग्लिश मीडियम हायस्कूल, नांदेपेरा रोडच्या विद्यार्थ्यांनी उल्लेखनीय कामगिरी करत विद्यालयाच्या शिरपेचात मानाचा तुरा खोवला आहे.
तालुकास्तरीय बुद्धिबळ स्पर्धेत १७ वर्षांखालील मुलींच्या गटात विद्यालयाची विद्यार्थिनी कु. आर्या प्रसाद चिडले हिने संपूर्ण वणी तालुक्यात प्रथम क्रमांक पटकावत शानदार यश संपादन केले. आपल्या संयमी खेळाने, अचूक डावपेचांनी आणि उत्कृष्ट बुद्धिमत्तेच्या जोरावर तिने प्रतिस्पर्ध्यांवर मात करत अव्वल स्थान मिळविले.
याच गटात कु. श्रावणी पांडुरंग ढोके आणि श्रीकल्प सेवक रूधे यांनी द्वितीय स्थान प्राप्त करून विद्यालयाच्या यशात भर घातली. तर १४ वर्षांखालील विद्यार्थ्यांच्या गटात विद्यालयाचा विद्यार्थी ओजस संतोष मार्कंडे याने तृतीय क्रमांक मिळवत उल्लेखनीय कामगिरी केली.
या स्पर्धेतील यशामुळे वणी लायन्स इंग्लिश मीडियम हायस्कूलच्या विद्यार्थ्यांची जिल्हास्तरीय बुद्धिबळ स्पर्धेसाठी निवड झाली असून, ते पुढील स्तरावर विद्यालयाचे प्रतिनिधित्व करणार आहेत. तालुकास्तरावर मिळविलेल्या या यशानंतर आता जिल्हास्तरीय स्पर्धेतही विद्यार्थी चमकदार कामगिरी करतील, अशी अपेक्षा व्यक्त होत आहे.
बुद्धिबळ हा केवळ मनोरंजनाचा खेळ नसून एकाग्रता, संयम, तर्कशक्ती, निर्णयक्षमता आणि नियोजन कौशल्य विकसित करणारा बौद्धिक खेळ म्हणून त्याकडे पाहिले जाते. अशा खेळांमध्ये विद्यार्थ्यांनी मिळविलेले यश त्यांच्या सर्वांगीण विकासासाठीही महत्त्वपूर्ण ठरत आहे.
विद्यार्थ्यांच्या या उल्लेखनीय यशाबद्दल विद्यालय व्यवस्थापन समितीचे अध्यक्ष मा. श्री. संजीवरेड्डी बोदकुरवार, उपाध्यक्ष मा. बलदेवजी खुंगर तसेच समितीच्या सर्व सदस्यांनी यशस्वी विद्यार्थ्यांचे अभिनंदन केले. अकॅडेमिक डायरेक्टर प्रशांत गोडे, प्राचार्या सौ. चित्रा देशपांडे तसेच विद्यालयातील शिक्षकवृंदानेही विद्यार्थ्यांचे कौतुक करून जिल्हास्तरीय स्पर्धेसाठी त्यांना शुभेच्छा दिल्या.
विद्यार्थ्यांच्या या यशामागे क्रीडा शिक्षक श्री. रूपेश पिंपळकर, सौ. नेहा शेख आणि श्री. किरण बुजोणे यांचे मार्गदर्शन लाभले. शिक्षकांच्या मार्गदर्शनासोबतच विद्यार्थ्यांनी घेतलेली मेहनत, सातत्यपूर्ण सराव आणि स्पर्धेतील आत्मविश्वास यामुळे हे यश मिळविता आले.
तालुकास्तरीय बुद्धिबळ स्पर्धेत मिळविलेल्या या यशामुळे वणी लायन्स इंग्लिश मीडियम हायस्कूलच्या शैक्षणिक गुणवत्तेसोबतच क्रीडा क्षेत्रातील विद्यार्थ्यांच्या उल्लेखनीय कामगिरीचीही पुन्हा एकदा झलक पाहायला मिळाली आहे.
