🏏 आंतरशालेय क्रिकेटमध्ये लायन्स इंग्लिश मीडियम स्कूलचा दबदबा!

⛔ मॅक्रून स्टुडंट्स अकॅडमीवर ४१ धावांनी मात; अजिंक्यपदासह ११ हजारांचे रोख पारितोषिक आणि चषक पटकावला

✍️वणी : महेश टिपले

इलेव्हन स्टार क्रिकेट क्लब, वणी यांच्या वतीने आयोजित करण्यात आलेल्या भव्य आंतरशालेय क्रिकेट स्पर्धेत लायन्स इंग्लिश मीडियम स्कूलच्या संघाने दमदार कामगिरी करत अजिंक्यपद पटकावले. शहरासह परिसरातील एकूण आठ शालेय संघांनी सहभाग घेतलेल्या या स्पर्धेतील अंतिम सामना चुरशीचा आणि क्रिकेटप्रेमींच्या उत्साहात भर घालणारा ठरला.

अंतिम सामन्यात लायन्स इंग्लिश मीडियम स्कूल विरुद्ध मॅक्रून स्टुडंट्स अकॅडमी असे चित्र होते. दोन्ही संघांनी विजयासाठी जोरदार प्रयत्न केले. मात्र, लायन्स स्कूलच्या खेळाडूंनी फलंदाजी, गोलंदाजी आणि क्षेत्ररक्षण या तिन्ही आघाड्यांवर प्रभावी खेळ करत सामन्यावर वर्चस्व मिळवले. अखेर लायन्स इंग्लिश मीडियम स्कूलने मॅक्रून स्टुडंट्स अकॅडमीचा तब्बल ४१ धावांनी पराभव करत विजेतेपदावर आपले नाव कोरले.

🎯 विजेत्या संघाला ११ हजारांचे रोख पारितोषिक

स्पर्धेच्या पारितोषिक वितरण सोहळ्यात विजेत्या लायन्स इंग्लिश मीडियम स्कूल संघाला ११ हजार रुपये रोख व चषक, तर उपविजेत्या मॅक्रून स्टुडंट्स अकॅडमी संघाला ७ हजार रुपये रोख व चषक देऊन गौरविण्यात आले.

हा पारितोषिक वितरण सोहळा डॉ. राहुल खाडे यांच्या शुभहस्ते पार पडला. यावेळी प्राचार्य प्रशांत गोडे, धवल पटेल, मधुकर कोंगरे, प्रशांत झाडे, विनोद केशवानी यांच्यासह विविध मान्यवर उपस्थित होते.

🎯 लायन्स स्कूलच्या खेळाडूंची वैयक्तिक पारितोषिकांवरही मोहोर

स्पर्धेत लायन्स इंग्लिश मीडियम स्कूलच्या खेळाडूंनी सांघिक विजेतेपदासोबतच वैयक्तिक पुरस्कारांमध्येही आपला ठसा उमटविला.

लायन्स स्कूलचा व्रीद ओंधरे याने अष्टपैलू कामगिरी करत ‘मॅन ऑफ द सिरीज’ तसेच ‘बेस्ट बॉलर’ हे दोन्ही पुरस्कार पटकावले. उत्कृष्ट फलंदाजी करणाऱ्या मोहित धनेगावकर याला ‘बेस्ट बॅट्समन’चा बहुमान मिळाला. अंतिम सामन्यात निर्णायक कामगिरी करणारा अंशुल भुजाडे हा ‘मॅन ऑफ द मॅच’ ठरला.

याशिवाय हर्ष खोब्रागडे, प्रीत खिरटकर, संकेत झाडे आणि फैजल शेख यांनीही विविध वैयक्तिक पुरस्कार पटकावत आपल्या उत्कृष्ट कामगिरीची छाप उमटवली.

🎯 मान्यवरांकडून खेळाडूंचे कौतुक

पारितोषिक वितरणप्रसंगी प्राचार्य प्रशांत गोडे यांनी मनोगत व्यक्त करत दोन्ही संघांच्या खेळाडूंचे अभिनंदन केले. विद्यार्थ्यांनी शिक्षणासोबतच क्रीडा क्षेत्रातही सातत्याने उत्कृष्ट कामगिरी करावी, असे आवाहन करत त्यांनी खेळाडूंना पुढील वाटचालीसाठी शुभेच्छा दिल्या.

कार्यक्रमाचे सूत्रसंचालन सुधीर लडके यांनी केले.

🎯 इलेव्हन स्टार क्रिकेट क्लबचे यशस्वी आयोजन

स्पर्धेच्या यशस्वी आयोजनासाठी इलेव्हन स्टार क्रिकेट क्लबचे अध्यक्ष राजेंद्र मदन, सचिन पांडे, श्याम कडू, आकाश वारारकर, अनुज साठे यांच्यासह क्लबच्या सर्व खेळाडूंनी परिश्रम घेतले. स्पर्धेचे शिस्तबद्ध नियोजन, उत्कंठावर्धक सामने आणि खेळाडूंना मिळालेली उत्तम संधी यामुळे या स्पर्धेचे क्रीडाप्रेमींनी कौतुक केले.

🎯 लायन्स स्कूल परिवाराकडून विजेत्यांचे अभिनंदन

लायन्स इंग्लिश मीडियम स्कूलचे क्रीडा प्रशिक्षक अविनाश ऊईके तसेच विजेत्या खेळाडूंचे अध्यक्ष तथा माजी आमदार संजीवरेड्डी बोदकुरवार, उपाध्यक्ष बलदेव खुंगर, संचालक मंडळ, मुख्याध्यापक चित्रा देशपांडे आणि शिक्षकवृंदांनी अभिनंदन केले.

लायन्स इंग्लिश मीडियम स्कूलच्या खेळाडूंनी मिळवलेल्या या यशामुळे शाळेच्या क्रीडा क्षेत्रातील लौकिकात आणखी भर पडली असून, वणी परिसरातील क्रीडाप्रेमींकडून विजेत्या संघावर कौतुकाचा वर्षाव होत आहे.