⛔काजी गजनफर अली साहेब व कवयित्री पुष्पा पाटील यांना प्रतिष्ठेचे पुरस्कार प्रदान; गुणवंत विद्यार्थ्यांचा उत्स्फूर्त सत्कार
✍️पांढरकवडा — अशफाक खान
केशरबाई चाहल स्मृती प्रतिष्ठान, पांढरकवडा (जि. यवतमाळ) यांच्या वतीने मातोश्री केशरबाई चाहल यांच्या ३८ व्या स्मृतीदिनानिमित्त आयोजित करण्यात आलेला भव्य सन्मान गौरव व गुणवंत विद्यार्थी पारितोषिक वितरण सोहळा १० फेब्रुवारी रोजी सायंकाळी ६ वाजता श्री शारदा ज्ञानपीठच्या प्रांगणात उत्साहात आणि दिमाखात पार पडला. समाजातील विविध क्षेत्रांत उल्लेखनीय कार्य करणाऱ्या मान्यवरांचा गौरव तसेच शैक्षणिक क्षेत्रात यश संपादन करणाऱ्या विद्यार्थ्यांचा सत्कार या कार्यक्रमात करण्यात आला.
कार्यक्रमाच्या अध्यक्षस्थानी ज्येष्ठ नेते व माजी मंत्री शिवाजीराव मोघे उपस्थित होते. प्रमुख अतिथी म्हणून नागपूर येथील ज्येष्ठ पत्रकार, संपादक व प्रभावी वक्ते तसेच पांढरकवड्याचे सुपुत्र बाळ कुळकर्णी यांनी उपस्थित राहून मार्गदर्शन केले. तसेच पंचायत समिती पांढरकवडा (शिक्षण) चे विस्तार अधिकारी गोकुल गंधे हे विशेष अतिथी म्हणून उपस्थित होते.
‘केशरबाई चाहल स्मृती सामाजिक पुरस्कार’ काजी गजनफर अली साहेब यांना
सन २०२४–२५ चा ‘केशरबाई चाहल स्मृती सामाजिक पुरस्कार’ पांढरकवडा येथील हिंदू–मुस्लिम एकतेचे प्रतीक म्हणून ओळखले जाणारे काजी गजनफर अली साहेब (माजी मुख्याध्यापक तथा जामा मशीद ट्रस्ट व शांतता समिती अध्यक्ष, पांढरकवडा) यांना जाहीर करण्यात आला होता. समाजात सलोखा, परस्पर आदर आणि शांततेचा संदेश देत त्यांनी केलेल्या दीर्घकालीन कार्याची दखल घेऊन त्यांचा सन्मान करण्यात आला. या पुरस्काराचे स्वरूप ११ हजार रुपये रोख, शाल व स्मृतिचिन्ह असे होते. प्रमुख मान्यवरांच्या हस्ते त्यांना हा सन्मान प्रदान करण्यात आला.
‘केशरबाई स्त्री पुरस्कार’ कवयित्री पुष्पा पाटील यांना
सन २०२३–२४ चा ‘केशरबाई स्त्री पुरस्कार’ संवेदनशील कवयित्री, समीक्षक व चिंतनशील लेखिका श्रीमती पुष्पा पाटील (मीना बिसेटवार), पुणे यांना जाहीर झाला होता. साहित्य क्षेत्रातील त्यांच्या उल्लेखनीय योगदानाची दखल घेत त्यांना ५ हजार रुपये रोख, शाल व स्मृतिचिन्ह देऊन गौरविण्यात आले. त्यांच्या साहित्यकृतींमधून स्त्री-सक्षमीकरण, सामाजिक जाणीव आणि मूल्याधिष्ठित विचार मांडले जात असल्याचे मान्यवरांनी आपल्या भाषणातून अधोरेखित केले.
🎯 गुणवंत विद्यार्थ्यांचा गौरव
शैक्षणिक सत्र २०२४–२५ मधील शालांत परीक्षेत उल्लेखनीय यश मिळविणाऱ्या विद्यार्थ्यांचा यावेळी सत्कार करण्यात आला. त्यामध्ये —
🔺शेखर सुरेश मल्लेलवार — शाळेत प्रथम (९५.६०%) : २१०० रुपये रोख (संस्थेतर्फे)
🔺कु. कल्याणी विष्णू कराळे — ‘मराठी’ विषयात प्रथम (९८ गुण) : १००० रुपये
🔺कु. टिया हरिभाऊ गुरनुले — ‘इंग्रजी’ विषयात प्रथम (९८ गुण) : ५०० रुपये
🔺कु. हंसिका मनीष बुर्रेवार व कु. साची दीपक वरगणे — ‘गणित’ विषयात प्रथम (९७ गुण) : प्रत्येकी ५०० रुपये
🔺कु. श्रुती राजीव आगरकर व शेखर सुरेश मल्लेलवार — ‘विज्ञान’ विषयात प्रथम (९८ गुण) : प्रत्येकी ५०० रुपये
विद्यार्थ्यांच्या या यशाबद्दल त्यांचे व पालकांचे अभिनंदन करण्यात आले. या विद्यार्थ्यांच्या यशामुळे इतर विद्यार्थ्यांनाही प्रेरणा मिळेल, असा विश्वास प्रतिष्ठानतर्फे व्यक्त करण्यात आला.
🎯 मान्यवरांचे मार्गदर्शन
अध्यक्षीय भाषणात शिवाजीराव मोघे यांनी सामाजिक सलोखा, शिक्षणाचे महत्त्व आणि मूल्याधिष्ठित कार्याची गरज अधोरेखित केली. प्रमुख अतिथी बाळ कुळकर्णी यांनी केशरबाई चाहल यांच्या स्मृती जपताना समाजहिताचे कार्य सातत्याने सुरू ठेवण्याचे आवाहन केले.
🎯 आयोजन व आभार
कार्यक्रमाचे सूत्रसंचालन व पाहुण्यांचा परिचय तनवीर शेख आणि प्रिया उमरे यांनी केले. मुख्याध्यापक राहुल देवतळे यांनी आभार प्रदर्शन केले. प्रस्ताविक भाषणात संस्थेच्या अध्यक्षांनी केशरबाई चाहल यांच्या कार्याचा आढावा घेत, समाजहित, शिक्षणप्रेम आणि स्त्री-सक्षमीकरण या मूल्यांचा प्रसार करण्यासाठी प्रतिष्ठान सातत्याने कार्यरत राहील, अशी ग्वाही दिली. तसेच २०२६ चा स्मृतीदिन सोहळा सामाजिक सलोखा, साहित्यिक परंपरा आणि शैक्षणिक गुणवत्तेचा अधिक व्यापक उत्सव ठरेल, अशी भावना व्यक्त करण्यात आली.
या सोहळ्यास शहरातील विविध क्षेत्रातील मान्यवर, गुणवंत विद्यार्थी व पालक, शाळेचे शिक्षक व कर्मचारी तसेच मोठ्या संख्येने विद्यार्थी उपस्थित होते. संपूर्ण कार्यक्रमात उत्साहपूर्ण आणि प्रेरणादायी वातावरण अनुभवास आले.
