✍️यवतमाळ : अशफाक खान
अवघ्या दोन महिन्यांच्या कालावधीत लाचलुचपत प्रतिबंधक विभाग (एसीबी) यवतमाळने केलेल्या सलग तीन यशस्वी सापळा कारवायांमुळे जिल्ह्यातील भ्रष्ट अधिकारी व कर्मचाऱ्यांमध्ये प्रचंड खळबळ उडाली आहे. “आता पुढचा नंबर आपलाच तर नाही ना?” अशी भीती अनेक लाचखोर अधिकाऱ्यांमध्ये निर्माण झाल्याचे चित्र दिसून येत आहे. एसीबीच्या सातत्यपूर्ण कारवाईमुळे जिल्ह्यातील भ्रष्टाचाराविरोधातील मोहिमेला वेग आला असून, सरकारी कार्यालयांमध्ये पारदर्शकता आणि जबाबदारीची भावना निर्माण होण्यास मदत होत असल्याचे बोलले जात आहे.
🎯 सलग तीन सापळा कारवाया
🔺19 मे : कळंब भूमिलेख कार्यालयात 25 हजारांची लाच स्वीकारताना महिला अधिकारी रंगेहात
🔺19 मे 2026 रोजी एसीबी यवतमाळने कळंब येथील भूमिलेख कार्यालयात धडक कारवाई करत फेरफार नोंदणीच्या कामासाठी 25 हजार रुपयांची लाच स्वीकारताना 37 वर्षीय परिरक्षण भूमापक (महिला लोकसेविका) यांना रंगेहात पकडले. या कारवाईने जिल्ह्यातील महसूल विभागात मोठी खळबळ उडाली होती.
🔺15 जुलै : जिल्हा परिषद बांधकाम विभागातील शाखा अभियंता 10 हजारांची लाच घेताना जेरबंद
त्यानंतर 15 जुलै 2026 रोजी अंतिम देयक मंजूर करून पूर्णत्व प्रमाणपत्र देण्यासाठी 10 हजार रुपयांची लाच स्वीकारताना जिल्हा परिषद, बांधकाम उपविभाग क्र. 1, यवतमाळ येथील 56 वर्षीय शाखा अभियंत्याला एसीबीने रंगेहात अटक केली.
🔺22 जुलै : महागाव येथे महिला बाल विकास प्रकल्प अधिकारी 5 हजारांच्या लाचेसह पकडल्या
यानंतर अवघ्या आठवड्याच्या आत, 22 जुलै 2026 रोजी महागाव येथे अतिरिक्त महिला व बाल विकास प्रकल्प अधिकारी (वय 57 वर्षे) यांना अंगणवाडी मदतनीस पदावर निवड करून देण्यासाठी 5 हजाराची लाच स्वीकारताना लाभार्थ्याचे काम करण्यासाठी लाच स्वीकारताना एसीबीने रंगेहात पकडले.
🎯 भ्रष्टाचाराची गंभीर स्थिती अधोरेखित
या तीन कारवायांवरून यवतमाळ जिल्ह्यात विविध शासकीय विभागांमध्ये भ्रष्टाचार किती खोलवर रुजला आहे, याची गंभीर झलक समोर आली आहे. नागरिकांकडून त्यांच्या कायदेशीर कामांसाठीही लाच मागितली जात असल्याचे या कारवायांतून स्पष्ट झाले असून, एसीबीने अशा प्रवृत्तीविरुद्ध कठोर भूमिका घेतल्याचे दिसून येत आहे.
🎯 महिलांचाही सहभाग चिंताजनक
विशेष बाब म्हणजे या तीन कारवायांपैकी दोन आरोपी महिला अधिकारी असून एक पुरुष अधिकारी आहे. त्यामुळे भ्रष्टाचार हा केवळ पुरुष अधिकाऱ्यांपुरता मर्यादित नसून महिलांमधील काही अधिकारीही लाचखोरीत सहभागी असल्याचे या प्रकरणांतून समोर आले आहे.
🎯 एसीबीचा भ्रष्टाचाराविरोधातील निर्धार
लाचलुचपत प्रतिबंधक विभागाने जिल्ह्यात भ्रष्टाचाराचे पाळेमुळे उखडून टाकण्यासाठी सातत्याने सापळा कारवाया सुरू ठेवल्या आहेत. नागरिकांच्या सहकार्यामुळेच अशा कारवाया यशस्वी होत असून, भ्रष्ट अधिकाऱ्यांवर कायदेशीर कारवाई करण्यात येत आहे.
🎯 नागरिकांना एसीबीचे महत्त्वाचे आवाहन
लाचलुचपत प्रतिबंधक विभागाने यवतमाळ जिल्ह्यातील नागरिकांना आवाहन केले आहे की, कोणत्याही शासकीय अधिकारी किंवा कर्मचाऱ्याने कायदेशीर शुल्काव्यतिरिक्त लाचेची मागणी केल्यास तात्काळ एसीबीशी संपर्क साधावा.
एसीबीने स्पष्ट केले आहे की—
– तक्रारदाराची ओळख गोपनीय ठेवली जाईल.
– प्राप्त तक्रारीवर तातडीने कारवाई करण्यात येईल.
– सापळा कारवाईत वापरलेली रक्कम नियमानुसार एका महिन्याच्या आत परत करण्यात येईल.
– तक्रारदाराचे वैध शासकीय काम पूर्ण होण्यासाठी आवश्यक ती कार्यवाही केली जाईल.
संपर्क
लाचलुचपत प्रतिबंधक विभाग, यवतमाळ
दगडी इमारत, टांगा चौक, यवतमाळ
टोल फ्री क्रमांक : 1064
दूरध्वनी : 07232-244002 / 8975791064
ई-मेल : dyspacbyavatmal@mahapolice.gov.in
श्री. अभय आष्टेकर
पोलीस उपअधीक्षक, एसीबी, यवतमाळ
मो. 8275088797
श्री. अर्जुन घनवट
पोलीस निरीक्षक, एसीबी, यवतमाळ
मो. 9623101706
श्री. मनोज ओरके
पोलीस निरीक्षक, एसीबी, यवतमाळ
मो. 8855080007
🎯 भ्रष्टाचारमुक्त प्रशासनाच्या दिशेने महत्त्वाचे पाऊल
अवघ्या दोन महिन्यांत झालेल्या या सलग तीन कारवायांनी यवतमाळ जिल्ह्यातील भ्रष्ट अधिकाऱ्यांना स्पष्ट इशारा दिला आहे. सार्वजनिक सेवेत पारदर्शकता, उत्तरदायित्व आणि भ्रष्टाचारमुक्त प्रशासन निर्माण करण्याच्या दिशेने लाचलुचपत प्रतिबंधक विभागाने उचललेले हे अत्यंत महत्त्वाचे पाऊल मानले जात आहे. आता नागरिकांनीही निर्भयपणे पुढे येऊन लाच मागणाऱ्या अधिकाऱ्यांविरोधात तक्रार केल्यास जिल्ह्यातील भ्रष्टाचारावर अधिक प्रभावीपणे अंकुश आणणे शक्य होणार आहे.
