⛔ डोलामाईटच्या ओव्हरलोड वाहतुकीपासून स्कूल बसेसपर्यंत अनेक प्रश्नांवर प्रशासनाला धारेवर धरणारे; ४८ तासांत कारवाई न झाल्यास ‘खळ्ळ-खट्याक’चा इशारा देणारे
✍️वणी / महेश टिपले
वणी शहर व विधानसभा क्षेत्रातील वाहतूक व्यवस्था, अवजड वाहनांची वाहतूक आणि नागरिकांच्या सुरक्षिततेशी संबंधित विविध प्रश्नांवर सातत्याने आवाज उठवत प्रशासनाला जाब विचारणारे महाराष्ट्र नवनिर्माण सेनेच्या वाहतूक सेनेचे राज्य उपाध्यक्ष इरशाद खान यांचा आज, २८ ऑगस्ट रोजी वाढदिवस आहे. गेल्या काही काळात त्यांनी डोलामाईटची अवैध व ओव्हरलोड वाहतूक, कोळसा वाहतूक, टोलमाफी, स्कूल बसेस, फेरीवाल्यांवरील कारवाई तसेच वणी वाहतूक नियंत्रण शाखेच्या कार्यपद्धतीसह विविध सामाजिक व सार्वजनिक प्रश्नांवर आक्रमक भूमिका घेतली होती.
🎯 डोलामाईटच्या ओव्हरलोड वाहतुकीविरोधात आवाज
वणी परिसरात क्षमतेपेक्षा अधिक डोलामाईटची वाहतूक करणाऱ्या वाहनांमुळे रस्ते वाहतूक, अपघातांचा धोका आणि नागरिकांच्या सुरक्षिततेचा प्रश्न निर्माण होत असल्याचा आरोप मनसे वाहतूक सेनेने केला होता. या प्रकरणात आरटीओ विभागाच्या कथित दुर्लक्षावर प्रश्नचिन्ह उपस्थित करत इरशाद खान यांनी परिवहन मंत्र्यांकडे आरटीओच्या कार्यप्रणालीचा उहापोह केला होता.
इतकेच नव्हे तर वणी येथील वाहतूक नियंत्रण शाखेच्या कार्यपद्धतीवरही त्यांनी प्रश्न उपस्थित करत, वाहतूक नियंत्रणात अपेक्षित परिणाम दिसत नसल्यास ही शाखा बंद करण्याची मागणी मुख्यमंत्र्यांकडे केली होती.
🎯 कोळसा वाहतुकीविरोधात आंदोलनाची भूमिका
वेकोलीच्या कोळसा वाहतुकीमुळे वणी परिसरातील रस्त्यांवर अवजड वाहनांची संख्या वाढून वाहतुकीवर मोठा ताण निर्माण होत असल्याचा मुद्दा मनसेने लावून धरला होता. या प्रश्नावर इरशाद खान यांनी आक्रमक भूमिका घेत आंदोलनाचा इशारा दिल्यानंतर काही काळ कोळसा वाहतूक ठप्प झाल्याचा दावा मनसेकडून करण्यात आला होता.
कोळसा वाहतुकीला त्यांनी ‘तांडव’ संबोधत संबंधित यंत्रणांच्या कार्यपद्धतीवर टीका केली होती. या प्रश्नावर ४८ तासांत ठोस कारवाई न झाल्यास ‘खळ्ळ-खट्याक’ आंदोलन करण्याचा इशाराही मनसे वाहतूक सेनेने दिला होता. त्यामुळे या आंदोलनाच्या भूमिकेची वेकोली प्रशासनासह संबंधित विभागांमध्ये चर्चा झाली होती.
🎯 स्थानिक वाहनधारकांसाठी टोलमाफीची मागणी
वणी आणि करंजी परिसरातील टोलनाक्यांवर स्थानिक वाहनधारकांना टोलमाफी मिळावी, अशी मागणीही मनसे वाहतूक सेनेने केली होती. स्थानिक नागरिकांना त्यांच्या दैनंदिन प्रवासासाठी वारंवार टोलचा आर्थिक भुर्दंड सहन करावा लागू नये, अशी भूमिका संघटनेने मांडली होती.
🎯 स्कूल बसेसच्या सुरक्षिततेचा मुद्दा ऐरणीवर
विद्यार्थ्यांच्या सुरक्षिततेशी संबंधित स्कूल बस वाहतुकीचा प्रश्नही इरशाद खान यांनी उपस्थित केला होता. काही स्कूल बसेसमधून क्षमतेपेक्षा अधिक विद्यार्थ्यांची वाहतूक होत असल्याचा आरोप करत संबंधित वाहनांची तपासणी करून नियमांचे उल्लंघन करणाऱ्यांवर कारवाई करण्याची मागणी करण्यात आली होती.
शालेय विद्यार्थ्यांच्या सुरक्षित वाहतुकीसाठी नियमांची काटेकोर अंमलबजावणी करण्याची गरज असल्याचे मनसे वाहतूक सेनेने अधोरेखित केले होते.
🎯 फेरीवाल्यांवरील कारवाईविरोधात भूमिका
वणी शहरातील फेरीवाल्यांवर वाहतूक पोलिसांकडून होत असलेल्या कथित दंडेलशाही विरोधातही मनसे वाहतूक सेनेने आवाज उठवला होता. या संदर्भात जिल्हा पोलीस अधीक्षकांकडे तक्रार करून फेरीवाल्यांवर कारवाई करताना कायद्याच्या चौकटीत आणि योग्य पद्धतीने कारवाई करण्याची मागणी करण्यात आली होती.
🎯 वाहतूक नियंत्रण शाखेच्या कार्यपद्धतीवर प्रश्नचिन्ह
वणीतील वाहतूक नियंत्रण शाखेची कार्यक्षमता, वाहनधारकांवरील कारवाई आणि शहरातील वाहतूक नियमनाच्या पद्धतीबाबतही मनसेने नाराजी व्यक्त केली होती. यासंदर्भात वरिष्ठ पोलीस अधिकाऱ्यांकडे निवेदने देऊन वाहतूक व्यवस्थेत सुधारणा करण्याची मागणी करण्यात आली होती.
🎯 निवेदन, तक्रार आणि आंदोलनातून सातत्याने पाठपुरावा
आरटीओ, पोलीस विभाग, महामार्ग पोलीस, वेकोली प्रशासन आणि टोल व्यवस्थापनाशी संबंधित विविध प्रश्नांवर निवेदने, तक्रारी आणि आंदोलनाच्या माध्यमातून पाठपुरावा करण्याची भूमिका इरशाद खान यांनी घेतली होती. डोलामाईटची अवैध ओव्हरलोड वाहतूक, कोळसा वाहतुकीचा प्रश्न, स्थानिकांसाठी टोलमाफी, स्कूल बसेसची सुरक्षितता, फेरीवाल्यांवरील कारवाई आणि वाहतूक नियंत्रण शाखेची कार्यपद्धती हे प्रमुख मुद्दे त्यांनी सातत्याने लावून धरले होते.
सामाजिक आणि सार्वजनिक हिताचे प्रश्न आक्रमकपणे मांडत संबंधित प्रशासनाला जाब विचारणारा मनसेचा चेहरा म्हणून इरशाद खान यांची ओळख निर्माण झाली आहे. प्रश्न केवळ उपस्थित न करता त्यांचा पाठपुरावा करून प्रशासनाकडून कारवाई करून घेण्यावर त्यांचा भर असल्याचे त्यांच्या विविध आंदोलनांतून दिसून आले आहे.
दरम्यान, इरशाद खान यांच्या वाढदिवसानिमित्त मनसेचे पदाधिकारी, कार्यकर्ते, मित्रपरिवार तसेच विविध सामाजिक क्षेत्रातील नागरिकांकडून त्यांच्यावर शुभेच्छांचा वर्षाव होत आहे. वाहतूक व सामाजिक प्रश्नांवरील त्यांचा लढा यापुढेही अधिक जोमाने सुरू राहावा, अशा शुभेच्छा यानिमित्ताने व्यक्त करण्यात येत आहेत.
